Air Berlin aumenta un 1,73% el númberu de pasaxeros

Air Berlin aumentó en 2009 un 1,73% el tráficu de pasaxeros nel Aeropuertu d'Asturies, frente a un descensu del 14% rexistráu de media y la "difícil" situación que vive'l sector.

Asina lo indicó'l direutor pa España y Portugal d'Air Berlin, Álvaro Middelmann, que señaló que la compañía pasó de ser la séptima nel 2008, con algo más de 95.400 pasaxeros a la quinta qu'opera dende Asturies, con 97.060 pasaxeros el pasáu añu. Amás, comentó que meyoraron les reserves al pasar de 13.000 a 17.500.
  
Álvaro Middelmann ufrió ayeri n'Uviéu una rueda prensa pa informar sobre la compañía y la so ufierta dende Asturies. Nel eventu tuvo acompañáu pola xerente de la Sociedá Rexonal de Turismu (SRT), Noelia Menéndez; y el conceyal de Turismu d'Uviéu, Gerardo Antuña. Amás, nel actu premiaron les axencies de viaxes 'El Corte Inglés' de Xixón, pol so volume de ventes; 'Viajes Valgrande' d'Uviéu, pola so medría; y 'Viajes Malabi' de Xixón poles sos ventes de grupos.  
 
Álvaro Middelmann recordó que la compañía ufierta dende Asturies nuevos vuelos a partir de 69 euros y encamentó l'usu del buscador d'ufiertes y la fórmula de la compra antemanada p'algamar los precios más favorables pal usuariu.
  
D'esta manera, Asturies tien conexón con Air Berlin a Palma de Mallorca, Copenhague, Sevilla, Viena y Zurich, a los que se sumen como nuevos destinos Basel y Linz. Amás, tien conexón con 16 aeropuertos d'Alemaña, siendo nuevu Erfurt.
  
Tamién calcó Middelmann que ta en marcha un 'microsite' na páxina de la compañía que permite conocer los destinos. Nesta llinia, esplicó qu'en collaboración col Principáu muéstrase la ufierta d'Asturies pal turista, un destín poco conocíu pero "curiosu" pa los alemanes "bien aficionaos al senderismu", y destacó l'interés que ta espertando Asturies n'Alemaña coincidiendo col Añu Santu y el Camín de Santiago.
  
N'otru orde de coses, el direutor d'Air Berlin pa España reconoció qu'a la compañía prestába-y ufiertar Madrid como destín dende Asturies, puesto que sabe qu'esti añu la ufierta qu'hai ye "probe y cara". Sicasí, esplicó que al nun tener aviones asitiaos n'España, de momentu nun se lo puede "plantegar".
  
Según dixo Álvaro Middelmann esa opción analizóse "munches veces" y tuviéronse conversaciones col Gobiernu asturianu, pero ye difícil  pola falta d'aviones asitiaos, anque afirmó que tampoco lo refuga.
  
"Tamos contentos dando serviciu a Asturies per Mallorca, pero lo de Madrid de momentu ye un tema que nun se pue plantegar, anque nun se refuga", dixo afirmando que "nun plazu de dos o tres años nun se pue imaxinar".