Ḷḷena celebra'l Mercáu de la Flor

Esti fin de selmana, Ḷḷena celebra’l VII Mercáu Tradicional de la Flor, entamáu pola Xunta Cultural Rebelgu nel barriu de La Caleya. Mientres dos díes va haber música y artesanía.

Les actividaes entamen el sábadu 10, a les 11 hores de la mañana, col entamu del mercáu d’artesania y l’actuación de la banda de gaites ‘Güestia’.A les 17 hores vendrán los xuegos tradicionales pa los guaḥes, pa darréu actuar el grupu de baille ‘La Flor de Xanzaina’.
 
A les 18 hores, peles cais del mercáu, podrá sentise l’actuación de ‘Andecha Turcipié’. Mientres qu’a les 22 hores, vendrá una nuechi Astur’ colos grupos Spanta la Xente, Felpeyu y Skanda, acompangada de l’amosamientu de cerámica cocío, poniendo asina pieslle a la primer xornada.
 
Yá en domingu, a les 11 hores volverá otra vuelta’l mercáu d’artesania, repitiendo tamién los xuegos tradicionales y l’actuación de ‘La Flor de Xanzaina’. A les 19 hores llegará la tonada de la mano d’Anabel Santiago y Héctor Braga. Pondrá’l puntu final al Mercáu de la Flor, un conciertu de Bastards on Parade, Skontra y True Quedart, too ello a partires de les 22 hores.