Ecoloxistes critiquen la inoperancia énte los incendios forestales

|

Delles asociaciones criticaron la "pasividá, dexadez ya inoperancia del Principáu frente a l'amenaza y degradación del mediu natural que suponen los 2.095 incendios rexistraos.

L'Asociación pa la Defensa Xurídica del Mediu Ambiente "Ulex", la Coordinadora Ecoloxista d'Asturies, l'Institutu pa la Calidá y la Educación Ambiental o la Plataforma pa la Defensa de la Cordillera Cantábrica, ente otros, recordaron que la cifra d'incendios en 2009, superó en 354 el númberu de los rexistraos l'añu anterior, y que, a la vista de los que yá se produxeron nesti mes de marzu, ye bien probable que suba sensiblemente mientres el presente añu 2010.
  
"Una vez identificada polos poderes públicos la principal causa de les quemes forestales n'Asturies, que nun 78,9 por cientu débese puramente al interés de dellos ganaderos asturianos en roturar pente medies de fueu los montes asturianos cola cuenta de crear camperes pa los sos ganaos", destacaron los ecoloxistes qu'acusaron a mediu Rural de nun poner los medios necesarios pa erradicar esta conducta delictiva enraigonada en dichu sector ganaderu.
  
Pa los coleutivos ecoloxistes l'interés particular d'unos pocos ciudadanos ta acabando añu tres d'añu con un bien coleutivu xurídicamente protexíu que satisfai funciones principalmente de caltenimientu del suelu frente a la erosión, de calidá ambiental y que tien un escepcional valor ecolóxicu y paisaxísticu.
  
Indicaron qu'énte esta realidá la Conseyería de Mediu Rural mira intencionadamente pa otru llau, permitiendo asina qu'esi destructivu interés particular y pecuniariu d'un pequeñu sector de la población prevaleza sobre l'interés xeneral del so caltenimientu.

Contador Estadistiques