Los palestinos consideren que la mediación entró nuna cai ensin salida

El xefe negociador palestín, Saeb Erekat, dixo qu'Estaos Uníos llegó a una "cai ensin salida" nel so intentu por volver a entamar les conversaciones de paz n'Oriente Próximu.

L'Autoridá Palestina reclama la conxelación de la construcción nos asentamientos hebreos de Cixordania y Xerusalén Este enantes de sentase otra vuelta a la mesa de negociaciones, de la que les partes llevantáronse n'avientu del 2008. Erekat pidió esti martes nuna entrevista a la emisora Voz de Palestina la cancelación de los planes pa construyir nueves viviendes israelines en Xerusalén Este.
  
"Pero paez que tolos contactos rexistraos col Gobiernu israelín y l'alministración estaounidense y otros estaos llegaron a una cai ensin salida, coles posiciones israelines calcando nel mantenimientu de los asentamientos", esplicó'l xefe negociador. L'últimu d'estos contactos tuvo llugar esti llunes y nél participaron el presidente palestín, Mahmud Abbas, y el cónsul xeneral norteamericanu, Daniel Rubinstein.
  
El periódicu israelín 'Haaretz' informó la selmana pasada de que'l presidente d'Estaos Uníos, Barack Obama, pidiera hai un mes al xefe del Executivu d'Israel, Benjamin Netanyahu, que conxelara les construcciones en Xerusalem Este mientres polo menos cuatro meses, como forma d'avanzar nestes conversaciones indirectes ente les partes directamente implicaes nel conflictu. Netanyahu yá anunció'l pasáu mes de payares una conxelación de diez meses, pero tan solo ye aplicable en Cixordania y non en Xerusalén Este.
  
Según Erekat, "paez que Netanyahu ta desafiando a tola comunidá internacional, cola alministración estadounidense al frente". El xefe negociador palestín llamentó que'l Gobiernu d'Israel "torgue l'entamu de les conversaciones indirectes" cola so postura actual.
  
Mentanto, el ministru d'Asuntos Esteriores israelín,  l'ultraderechista Avigdor Lieberman, repitió a Israel Radio que nun s'atayará la construcción en Xerusalén Este. "Nin nel oeste de la ciudá nin nel este de la ciudá, tantu pa los xudíos como pa los árabes", repostió.