5.000 visitantes na primer edición del ‘Primer sidre l’añu’

El ‘Primer sidre l’añu’ foi un ésitu según la organización, con más de 5.000 persones nel Muséu del Pueblu d’Asturies pa prebar la sidra nuevo de los 60 llagares que participaron.

La entrada pa esfrutar de los conciertos, la exhibición de deportes tradicionales, les esposiciones y los puestos asitiaos al redor del festival yera dafechu de baldre, teniendo solo qu'abonar 5 euros aquellos interesaos en prebar la sidra.
 
En recibiendo una pulsera, solo facía falta averase a la barra y solicitar tolos culinos que se quixera. Pa ello, tamién podría facese con un vasu de cristal conmemorativu, con un costu de 1,5 euros, o con xarres de sidra tradicionales de cerámica feches en Ḷḷamas del Mouro (Cangas del Narcea), por 10 euros.
 
Los amantes de la sidra tamién pudieron esfrutar coles tasties o prebes de sidra dirixíes por Manuel Busto, dedicaes cada xornada a un productu. Asina la sidra brut foi protagonista'l vienres; la sidra de xelu, el sábadu; y l’aguardiente de sidra, el domingu. Tamién d'una esposición de la colección récord Guinness de corchos de sidra y otra d'etiquetes al cargu de l'asociación ‘Sidrastur’.
 
Nel ámbitu musical, destacó la celebración del certame ‘I Asturianada y sidre’, entamáu por Xosé María García ‘Llábana’ y pol musicólogu Llorián García, nel que participaron el presente y el futuru de la canción asturianu. Asina, pudieron sentise les voces de figures consolidaes, como Carlos Rubiera, Mari Luz Cristóbal o Anabel Santiago, y nuevos valores como Raúl Díaz, Noemí Torrado o los hermanos Marisa y Fernando Valle que, inclusive, llegaron a componer dalgún tema dedicáu al festival. Tamién aidaron a animar el festival los componentes de l’Andecha de Folklore Tradicional La Deva’ colos sos bailles y la so música los tres díes del certame.
 
La televisión pública británica BBC tuvo tamién nel festival pa tomar imaxes pa un episodiu de la serie documental ‘Hidden Spain’, especializada en gastronomía, que ta asesorada pola Sociedá Rexonal de Turismu.
 
Dende la Fundación Asturies XXI y la revista La Sidra, organizadores del ‘Primer sidre l’añu’, indiquen que namás puen calificar esta primer edición del festival como un ésitu. “Yá nós atopamos buscando nueves idees p'ameyorar en tolos sentíos esti eventu que pretendemos consolidar como un referente nel mundu de la sidra”, señalen.