Un 20% de los llibros publicaos nel 2009 foron n'asturianu

|

El Gremiu d'Editores d'Asturies estimó qu'un 20% de los llibros publicaos en 2009 foron n'asturianu. Trátase d'un porcentaxe que se caltuvo nos últimos años nestos mesmos términos.

Son datos aproximativos que la selmana pasada ofreció la presidenta del Gremiu, Marta Magadán, en declaraciones a Europa Press. El coleutivu tovía nun cuenta con cifres concretes de los sos editoriales, pero sí estima que nel 2009 publicáronse unos 800 títulos nes editoriales asturianes (1.200 en total, sumando lo editao poles instituciones), de los qu'un 20% van ser n'asturianu.

Marta Magadán calculó que la cifra va ser asemeyada a otros años, pese a que va haber un lixeru descensu del total de títulos publicaos, motiváu principalmente pola situación económica. Nunos casos el descensu de ventes, y n'otru casu'l descensu de puntos de venta, pese a qu'esti factor n'Asturies nun foi determinante, motivaría una previsible cayida de publicaciones.  
  
El porcentaxe de llibros n'asturianu n'Asturies sería considerablemente inferior al d'otres llingües territoriales en comparanza col total de títulos editaos nos sos territorios, onde, al contrario que nel casu del asturianu, son oficiales. Nes comunidaes de fala catalana (Cataluña, Valencia y Baleares) los títulos en catalán sumaríen el 32,16% del total, nel País Vascu subiría a un 45,7% les publicaciones n'eusquera y en Galicia la edición en gallegu sería d'un 57,32%.
 

Contador Estadistiques