Ecoloxistes protesten contra un nuevu parque eólicu en Tinéu

La Coordinadora Ecoloxista presentó suxerencies al Parque de Picu Liebres, los ecoloxistes señalen los daños al paisaxe y patrimoniu, y que Tinéu ye’l conceyu con más molinos.

El parque eólicu proyeutáu va tener seis molinos de 2 Mw. de 80 metros d'altor y 90 metros de diámetru. “Esti nuevu parque ta nun conceyu onde yá tán funcionando na actualidá dos y hai diez parques mas previstos con un total de 190 molinos, lo que convierte a Tinéu nel conceyu asturianu con mas molinos, yá que Bual tien proyeutaos 13 parques con 185 molinos”, esclarien dende l’asociación ecoloxista.
 
Esti parque ye unu de los 88 parques previstos nel occidente asturianu, lo que pa la Coordinadora supón que l'impactu de toos ellos tien efeuto acumulativu, “onde hai que sumar los impactos de les llinies d'evacuación y les subestaciones eléctriques”, polo qu'entienden qu'esti conxuntu precisa sometese a la evaluación conxunta col restu de parques.
 
Los ecoloxistes tamién reseñen l'impactu nel paisaxe d’estes instalaciones, “los aeroxeneradores pol so tamañu y pol so allugamientu tienen un gran impactu visual y paisaxísticu, que los fai visibles dende munchos quilómetros. de distancia”.
 
Pal allugamientu de los aeroxeneradores ye necesario l'apertura de pistes, que pa l’asociación supón el desaniciu direuto del suelu, “la eliminación de los usos a los qu'antes se dedicaba, agricultura, ganadería, caza, etc. y espropiaciones de finques, tamién supón la destrucción de la vexetación de la zona y mayor riesgu de quemes, de furtivos, ya inclusive más ruíos y molesties a la fauna montesa”.
 
Amás, recuerden que va afeutar al patrimoniu históricu, yá que na zona hai dos túmulos funerarios, un círculu líticu y dos petroglifos, y qu’al tar al llau del repetidor de Penouta va suponer un impactu sobro les emisiones dixitales de televisión y sobro les telecomunicaciones, “yá en condiciones bien precaries en tola zona”.
 
Pa finar, recuerden qu'Asturies ye excedentaria na producción eléctrica, “estos parques previstos toos ellos pal occidente, súmense a les nueve térmiques de gas previstes y a les térmiques que yá tenemos en funcionamientu, lo que nos va faer mas excedentarios contra los criterios lóxica enerxética”.