Llamazares encamienta a comprometese col Arte Asturianu

Gaspar Llamazares criticó la política d'Uviéu y del Principáu col Arte Asturianu. Amás, alvirtió de sectores na FSA que busquen conflictos con IU, “pero vamos aguantar”.

El diputáu d'Izquierda Unida nel Congresu de los Diputaos calcó na necesidá de que s'ellabore un plan específicu sobre l’Arte Asturianu, pa lo cual ye necesariu'l compromisu d'ambes alministraciones. "Resulta interesáu que los que más teníen que tar comprometíos col Prerrománicu seyan precisamente los que menos voluntá tienen de protexelo", llamentó.
 
Llamazares fixo estes declaraciones güei nes inmediaciones de la fonte de Foncalada, n'Uviéu, a onde acudió acompañáu del diputáu d'IU-BA-Verdes, Roberto Colunga, del coordinador d'IU d'Uviéu, Alejandro Suárez, y del voceru de Los Verdes d'Uviéu, Javier Lozano.
  
No que se refier a la Fuente de Foncalada, declarada Patrimoniu de la Humanidá, apocayá abrióse una discoteca nes inmediaciones. "Tan cuestionándose valores culturales bien importantes, y al mesmu tiempu la ciudá preséntase a capitalidá cultural d'Europa", dixo.
  
Asina, señaló qu'IU dirixiráse otra vuelta al Gobiernu español pa que se ponga en marcha un plan que comprometa al Conceyu y al Principáu y que protexa "de verdá" l’Arte Asturianu.
  
Pela so parte, Alejandro Suárez señaló que la so formación política va poner tolos mecanismos en marcha pa lluchar contra "actos de barbarie" como l'asocedíu na Fuente de Foncalada. Tamién criticó la situación de Bendones, onde hai otru monumentu en peligru.
 
FSA-PSOE
  
Preguntáu sobre les últimes tensiones polítiques nel senu del Gobiernu asturianu, que comparten, Llamazares señaló que da la impresión de qu'hai sectores de la FSA-PSOE que busquen de continuo conflictos con IU. "Y cuando lo quemaron, busquen otros", señaló.
  
"Dicímos-yos que nun van tener fácil emburriar a IU a la cuneta", alvirtió Llamazares, que dixo que la so formación política va aguantase, esixendo los compromisos del acuerdu de Gobiernu. "La izquierda asturiana ye plural y non como ellos creen, escluyente", acabó.