Cascos ve una marea creciente que considera oportunu'l so regresu

Álvarez-Cascos dixo que resulta evidente qu'hai "una marea creciente" de persones que consideren oportunu'l so regresu a la política como candidatu a la presidencia del Principáu

Sicasí, señaló que nun puede añadir namás porque nun tomó nenguna decisión. Asina respondió, cuando-y preguntaron sobre la so posible vuelta a la política, nuna entrevista concedida a la Cadena COPE y recoyida por Europa Press. Álvarez-Cascos almitió qu'oi y escucha lo que ta diciendo "tol mundu" n'Asturies. Sí quiso espresar públicamente la so "preocupación" pol deterioru de la convivencia que se ta produciendo tantu n'Asturies como n'España mientres estos años. "Yo tengo munches más preocupaciones de les que tenía nel 2004 sobre'l rumbu d'Asturies y d'España".
  
Cascos, que tuvo 25 años na llinia activa de la política, comentó que sigue sintiendo la política pelos cuatro bandes. "Nun perdí nin una migaya del entusiasmu que tenía como militante del PP", apuntó.
  
Preguntáron-y pol casu del ex presidente del Govern balear y ex ministru de Mediu Ambiente, Jaume Matas, y dixo que l'autu de procesamientu paez-y impropiu porque tien un llinguaxe "tabernariu". Al so xuiciu, lo qu'ha facer un partíu ye confiar en xueces y fiscales. Pero señaló que "si ún llee güei la prensa, menos ver que'l xuez y los fiscales son imparciales, puede atopase de too". Cascos cree qu'un xuez instructor qu'en cuenta d'ofrecer pruebes, niega la presunción d'inocencia ye un elementu preocupante.
  
Pero tamién-y preocupa que nun s'investigue a tol mundu tea siendo investigáu "pol mesmu raseru". Asina, Álvarez-Cascos comentó que los sobrecostos del velódromu Palma Arena "nun son nada" si se comparen con otros sobrecostos que se producieron n'otres obres públiques n'España. Asina, punxo l'exemplu de les obres d'ampliación del puertu d'El Musel, en Xixón, axudicaes en 500 millones y que tienen un sobrecostu de más de 200 millones, lo que llevó a la Unión Europea "a retirar les ayudes", según Cascos. "Nun lo investigó naide", señaló l'ex vicepresidente del Gobiernu español.