Denuncien la “campaña de mieu” pa sofitar el modelu enerxéticu

Ecoloxistes n’Aición critica la falta de rigor nos argumentos utilizaos pa sofitar la instalación de nueves llinies d'alta tensión, “yá que lleven décades amenazándonos col desastre total”.

Los ecoloxistes afirmen que mientres les últimes dos décades Red Electrica Española y Principáu vienen amenazando col desastre total si nun se construyíen les llinies d'alta tensión, de Lada-Velilla o Soto-Penagos. “Dende Ecoloxistes n’Aición d’Asturies lo que podemos ver ye que tan urxente nun sería, cuando pasaron venti años, y tou paez funcionar con normalidá, a pesar de que la demanda eléctrica española doblóse, y que la xeneración eléctrica asturiana llegó medrar hasta nun 50%”, apunten.
 
“L'usu del catastrofismu contradiz los mensaxes previos de REE, como los del añu 2004, cuando en xineru, en plenu iviernu, y con niveles altos de producción y consumu, cayó una de les torres de la llinia Soto La Robla”, afirmen dende l’asociación.
 
Pa los ecoloxistes, el modelu enerxéticu propuestu nun tien en cuenta la realidá, “yá que si nes condiciones anteriores funcionó con normalidá, como pue ser un problema la non instalación agora que la xeneración eléctrica asturiana, mientres el 2009, foi la segunda más baxa nestes dos décades, colo que’l saldu de xuru va ser importador, dao la medría de la demanda”.
 
Dende Ecoloxistes n’Aición d’Asturies afirmen que nun se pue siguir esportando, “si tol mundu ye xenerador, y que lo que tamos viendo na situación asturiana, como yera previsible, ye un descensu na participación en xeneración, descensu entá mayor si nos referimos a la xeneración en centrales térmiques”.
 
Situación que pa l’asociación nun va variar sustancialmente cola aprobación del ‘Decretu d'ayudes al carbón’, “yá que la medría va quedar compensada col amenorgamientu de la producción de centrales como Lada o Aboño, o lo que ye peor, en centrales de gas”.
 
A lo último, piden a Hugo Morán, secretariu federal de Mediu Ambiente del PSOE, que seya más de prudencia col tema d'AVE, “yá que depués d'años de denuncies de los grupos ecoloxistes, agora resulta que vien el señor Morán dándonos la razón y diciendo que l'Alta Velocidá implementa los consumos d'enerxía”.