Cultura convoca los cinco premios de lliteratura n'asturianu

El BOPA publicó'l pasáu vienres la convocatoria de los cinco premios lliterarios que'l Principáu promueve col fin de "consolidar, arriquecer y prestixar la llingua y cultura asturiana".

Caún d'ellos ta dotáu con 7.000 euros y cola publicación de la obra. Estos premios -que reconocen el trabayu creativu de narradores, poetes, ensayistes y autores de lliteratura infantil y cómic- llograron convertise en referente y reflexu del desenvolvimientu de la lliteratura en llingua asturiana a lo llargo de les últimes décades.
 
El plazu pa presentar obres de creación a estos galardones remata'l 10 de setiembre de 2010. Pa más información pue consultase nel BOPA del 26 de marzu y na páxina Web www.politicallinguistica.org.
 
Los galardones son el Premiu ‘Xosefa Xovellanos’ de novela en llingua asturiana, que ñació nel añu 1980 col aval institucional de l'antigua Diputación Provincial d'Asturies, predecesora de la Xunta Xeneral del Principáu. Poro, esti premiu, al que pueden presentase noveles inédites y con una estensión mínima de setenta y cinco folios, llega anguaño a la so 31 edición.
       
El Premiu ‘Xuan M.ª Acebal’ de poesía en llingua asturiana, dotáu tamién con 7.000 euros, y qu’algama la so edición decimosesta. Puen presentase poemarios inéditos con una estensión mínima de quinientos versos.
 
Mientres que’l Premiu ‘María Josefa Canellada’ de lliteratura infantil y xuvenil creóse en 2008. “El saltu cualitativu y cuantitativu que nos últimos años dio la creación lliteraria en llingua asturiana dirixida a los más nuevos ratifiquen l'aciertu d'esta convocatoria”, indiquen dende Cultura.
       
Tamién convoquen la dieciséis edición del Premiu ‘Máximu Fuertes Acevedo’ d'ensayu en llingua asturiana y la segunda del Premiu ‘Alfonso Iglesias’ de cómic.