La Llei d'Usu aragonesa tamién camín del Constitucional

Dellos alcaldes del PP pertenecientes a conceyos afeutaos pola Llei de Llingües d'Aragón, van plantegar la posibilidá de presentar un recursu d'inconstitucionalidá a la mesma.

Los conceyales van presentar güei martes, 30 de marzu, nel Rexistru Xeneral del Gobiernu d'Aragón, nel Edificiu Pignatelli, una solicitú al Conseyu Consultivu d'Aragón pa qu'emita un dictame previu, como requerimientu obligáu, pa plantegar un recursu d'inconstitucionalidá pola aplicación de la citada llei per parte del Gobiernu d'Aragón.

Acompañaos pol vicesecretariu de Política Institucional de los populares aragoneses, el senador por Teruel, Manuel Blasco, los alcaldes del PP van presentar la solicitú a les 12.00 hores.
  
Según recuerden, l'artículu 75 ter 3 de la Llei Orgánica del Tribunal Constitucional esixe que, con carácter previu a la formalización del recursu -conflictu constitucional en defensa de l'autonomía local-, el Conseyu Consultivu d'Aragón tendrá d'emitir un dictame non vinculante.
  
Los alcaldes consideren que dellos de los artículos de la Llei d'usu, protección y promoción de les llingües propies d'Aragón, aprobada'l pasáu 22 d'avientu pol Parlamentu aragonés a iniciativa del Partíu Socialista, "lesionen gravemente la so autonomía local reconocida na Constitución".
  
Recientemente, el Tribunal Constitucional avaló la constuticionalidá d'una llei asemeyada, la de Promoción y Usu del Asturianu. Nesi casu, un xuez plantegó la cuestión d'inconstitucionalidá, tres recibir un recursu d'un abogáu de l'Alministración autonómica d'Asturies contra una denegación d'un permisu llaboral, por tar la solicitú escrita n'asturianu.