Entamen una campaña pa pidir la oficialidá a les autoridaes españoles

La Xunta pola Defensa de la Llingua y Xuristes, entamen una campaña pa que l'Estáu siga les recomendaciones del Conseyu d’Europa y meyore’l status llegal del asturianu.

La campaña presentáronla güei Carlos Pulgar, miembru de la Xunta, y Xurde Blanco, secretariu de l’Aconceyamientu de Xuristes pol Asturianu, y quier que coleutivos y asociaciones firmen un documentu dirixíu al Conseyu de Ministros del Estáu pa que cumpla coles recomendaciones del Conseyu d’Europa sobre l’asturianu.
 
Eses recomendaciones foron recoyíes en 2008, nel últimu documentu del Comité d’Espertos sobre’l cumplimientu de la Carta Europea de les llingües minoritaries, roblada pol Estáu en 2001. Ente les cuestiones que recueye l’informe sobre l’asturianu, ta la resquiebra ente la demanda social y que nun seya llingua oficial, invitando a les autoridaes a contemplar, en collaboración colos falantes, la posibilidá de meyorar el nivel de proteición que tien l’idioma del país nel Estatutu d’Autonomía.
 
Pa Xurde Blanco, secretariu de Xuristes, el Gobiernu español lleva añu y mediu ensin cumplir col Conseyu d’Europa, organismu de defensa de los drechos humanos al que pertenecen 47 estaos. “Agora, un garapiellu de falantes y asociaciones vamos dirixinos al Estáu pa dici-yos que tamos equí y les instituciones tienen que cumplir colos nuestros derechos”, afirmó Blanco.
 
Pel momentu, 25 asociaciones culturales, deportives o de vecinos yá firmaron el documentu y agora quieren abrir la participación a los ciudadanos a títulu individual. “Pa ello, toles persones puen descargar el documentu pa dar voz a la comunidá de falantes énte los organismos europeos y el propiu gobiernu estatal”, apuntó Carlos Pulgar.
 
La campaña va dirixida al Conseyu de Ministros yá que según Xurde Blanco ye’l que nun ta cumpliendo’l mandáu y quien robló la Carta Europea de les llingües. Según el xurista “coles autoridaes asturianes hai poco que falar nesta materia, nun hai interlocutor”.
 
Tolos coleutivos o ciudadanos interesaos en sumase a la iniciativa, que va dir acompañada d’una fuerte promoción nos medios dixitales y al traviés de redes sociales como Ximiélga.me o Facebook, puen descargar el documentu na propia web de la Xunta.