Empreses asturianes firmen acuerdos comerciales con Marruecos

Les empreses asturianes participantes na misión a Marruecos de la mano d'Asturex llograron zarrar alcuerdos comerciales nun país que presenta esti añu grandes oportunidaes.

Les compañíes del país destacaron les posibilidaes de negociu qu'ofrez esti mercáu, tanto ye asina que delles algamaron zarrar importantes acuerdos comerciales mientres la so estancia.
  
Dalgunes de les firmes yá contaben con esperiencia previa nel país. Por casu Talleres Zitrón; Vulcanizados Trancho; Ascensores Tresa; Xeneral de Juguetes; Hierros y Carbones, HICASA; SATEC o Sidercal Minerales.
  
Otres empreses acudíen la primer vez pa esplorar les sos posibilidaes en Marruecos, como ye'l casu d'Encaja Embalajes que ta dando los sos primeros pasos nesti país, con un productu dafechu innovador de patente propia, la caxa ECU (una caxa de madera fabricable en cualquier dimensión y reutilizable). Tres la misión, considera que ye un mercáu de grandes posibilidaes por cuenta de la gran aceptación del so productu y la solicitú de cotizaciones de delles empreses, ente elles la mayor distribuidora d'embalaxes de Marruecos.
  
La compañía Bodega Fernández, realizó una prospección de mercáu, centrando la so ufierta nos sos vinos y el so vermú de solera; Vetenero visitó la primer vez el mercáu colos sos perfiles d'aluminiu y PVC pa construcción, sector en desarrollu en Marruecos. Ta analizando la busca d'un sociu -ente los visitaos mientres la misión- pa realizar una Joint-Venture de tresferencia de tecnoloxía; y Grupo Cureses, empresa del sector de materiales de construcción y maquinaria afín, tres la misión recibió delles cotizaciones pa grandes proyectos de construcción y ta estudiando la posible implantación d'una filial marroquí d'una de les empreses del grupu.