Ciquitrinos y Gatos del Fornu anuncien una xira conxunta pa presentar los sos nuevos discos

|

Los grupos Ciquitrinos y Gastos del Fornu van realizar esti añu una xira conxunta per Asturies, y si pue ser per fuera de la comunidá, pa presentar los sos nuevos trabayos.

Dambos discos, 'Faciendo l'indio' (Ciquitrinos) y 'Na Cai' (Gatos del Fornu), diéronse a conocer güei oficialmente a los medios de comunicación y al públicu nuna rueda prensa celebrada nel salón d'actos del Real Institutu d'Estudios Asturianos (Ridea). L'actu presentólu l'actual director del Festival Intercélitu de Lorient, l'asturianu Lisardo Lombardía, que tuvo acompañáu por Ruma Barbero, percusionista de Ciquitrinos, y Guillermo Pérez, gaiteru de Gatos del Fornu.

Dambos grupos prevén entamar una xira a últimos de xineru que los lleve per tola xeografía asturiana, si bien tamién esperen salir a tocar fuera de la comunidá, a llugares como Galicia, Castiella o Madrid. Tovía nun se cuenta con feches y llugares concretos.

Nel casu de Ciquitrinos, trátase del primer discu que publica esta formación, dende qu'entamare la so carrera musical hai once años. Consta d'once temes del particular estilu d'esti grupu recoyíos nun álbum que se presenta en formatu cómic, dibuxáu pol propiu Ruma Barbero, y nel que se narra irónicamente, y faciendo un paralelismu cola mitoloxía hindú, la historia del grupu. Tolos temes son instrumentales menos el 'Rap de l'alopecia' y 'Probetacu, beatu y fatu'. El discu prodúxolu'l músicu alemán Andreas Prittwitz.

El nuevu trabayu de Gatos del Fornu inclúi once temes tradicionales, de los ques siete son cantaos. Según esplicó Guillermo Pérez, el conxuntu quiso incorporar a esti trabayu toles collaboraciones coles que cuenten nos sos conciertos, motivu pol que s'incluyen participaciones como les del grupu de panderetes Herbamora, o de la Banda Gaites Xiranda, amás de les percusiones de Jim Sutherland, músicu escocés que produxo'l trabayu.

El diseñu de la portada tamién muestra un trabayu orixinal, nel que se muestren dos gatos na cai, ún d'ellos portando una guitarra, y ente ellos una pintada na que se llee'l títulu del nuevu álbum.

Lisardo Lombardía destaco la calidá de la música ellaborada por dambes formaciones, amás de la orixinalidá de les sos propuestes.

Contador Estadistiques