Piden a ETA un altu'l fueu y al Gobiernu una nueva negociación

Personalidaes irlandeses y africanes especializaes en procesos de paz reclamaron a ETA un altu'l fueu supervisáu internacionalmente y al Estáu un procesu de diálogu.

L'ex presidente sudafricanu Frederick Le Klerk, l'arzobispu del so país Desmond Tutu, la fundación Nelson Mandela, los ex primeros ministros irlandeses John Hume, Mary Robinson y Albert Reynolds y otres 16 personalidaes, quieren que'l Gobiernu español respuenda si ETA tamién lo fai, con un procesu de diálogu. que permita "resolver les diferencies y algamar una paz duradera".
 
Nuna declaración presentada nel Parllamentu Européu pol mediador sudafricanu Brian Currin, los cabezaleros internacionales valoraron el "compromisu públicu" asumíu pola esquierda abertzale de recurrir a medios "puramente políticos y democráticos" p'algamar los sos oxetivos políticos en "ausencia total de violencia". Al so xuiciu, esti compromisu recoyíu nuna declaración publicada'l 16 de febreru, si se respeta, "pue ser un pasu importante pa poner fin al últimu conflictu que pervive n'Europa".
  
"Pidimos a ETA qu'apoye esti compromisu declarando un altu'l fueu permanente, supervisáu dafechu", reclamen los firmantes. "Esta declaración, respondida adecuadamente pol Gobiernu (español) dexaría que los nuevos esfuercios políticos y democráticos avancen, que les diferencies se resuelvan y que se algame una paz duradera", acaba'l testu.
  
Ente los firmantes de la declaración, mayoritariamente irlandeses y sudafricanos, hai cuatro premios Nobel de la Paz (Le Klerk, Tutu, Hume y l'irlandesa Betty Williams). Tamién ta'l xefe de gabinete de Tony Blair cuando ésti yera primer ministru británicu, Jonathan Powell, o l'ex secretariu xeneral de Interpol, Raymond Kendall, amás de nueve académicos especialistes en procesos de paz, fundamentalmente d'universidaes estadounidenses.
  
Currin almitió qu'una simple declaración d'altu'l fueu per parte d'ETA nun sería bastante, porque nun xeneraría "confianza" al acabar tregües semeyantes nel pasáu. "La importancia del altu'l fueu que tamos pidiendo ye que taría supervisáu internacionalmente por un órganu internacional independiente. Nun ye un altu'l fueu nel que nun se puea confiar", esplicó'l mediador sudafricanu.
  
Anque nun quiso establecer plazos pa esta nueva tregua, Currin dixo que "si en 12 meses nun pasó nada de nada, sería bien triste". Y esplicó que'l siguiente pasu tendría de ser que la esquierda abertzale "respuenda positivamente" a esta declaración de personalidaes internacionales pidiendo a ETA que declare un altu'l fueu permanente.
  
Si la banda terrorista respuende a esti llamáu, el Gobiernu español debería en primer llugar aceptar la creación del órganu internacional independiente pa supervisar la tregua y entablar dempués un nuevu procesu de diálogu, señaló'l mediador sudafricanu.
 
Condena de la violencia
  
Anque la declaración internacional nun dirixe nengún pidimientu concretu al Gobiernu español más allá de responder a la tregua, Currin esplicó que, na so opinión personal, ente les midíes que tendría d'adoptar ta la llegalización de Batasuna, l'averamientu de los presos al País Vascu y la relaxación de la lexislación sobre seguridá.
  
Si ETA nun respuende al llamáu d'esta declaración internacional y prosigue colos atentaos, el mediador sudafricanu apuntó qu'espera que "la esquierda abertzale condene la violencia". "Si ello asocede, inevitablemente va haber una rotura ente los actores políticos y los que siguen apostando pola violencia", indicó Currin.