Asciz presenta n'Uviéu una iniciativa pa refugar la incineradora

Asciz presentó una proposición qu'esclúi espresamente la incineración o usu como combustible de los residuos d'orixe domiciliariu procedentes del Conceyu d'Uviéu.

Asina, l'Asamble de Ciudadanos por la Izquierda muestra'l so refugu al "macroproyectu" de construcción d'una incineradora n'Asturies. La iniciativa pide promover la consecución de los oxetivos más avanzaos de recoyida selectiva y reciclaxe de residuos d'envases establecíos na normativa vixente, según asume impulsar la consecución de los oxetivos de compostaxe de la fracción orgánica de los residuos domésticos pa reducir el depósitu en vertederu establecíos nel Plan Básicu de Residuos n'Asturies 2001-2010.
  
A xuiciu d'Asciz, la sociedá asturiana ta viviendo un gran dabete social sobre cómo encarar a mediu plazu la xestión de los residuos d'orixe domiciliariu. Trátase de residuos que son un "grave problema" pero que, según Asciz, cuando se xestionen de forma correcta tornen en "recursos" que contribúin al aforru de materies primes, al mantenimientu de los recursos naturales, del clima y al desarrollu sostenible.
  
Pal Grupu Municipal, la incineración de los residuos d'orixe domiciliariu que se vien plantegando pal próximu futuru, nun paez "nin sostenible, nin rigorosa, nin adecuada a la realidá d'Asturies", y ta dividiendo a les fuerces polítiques y sociales ante un problema que precisa del acuerdu políticu más ampliu. Ye algo qu'afecta al conxuntu de los Ayuntamientos, "perxudicando a les sos economíes y a les de tolos ciudadanos ante una previsible subida de tases pa financiar el macroproyectu d'incineradora", señalaron.