Busquen a dos muyeres y un home implicaos nos atentaos

|

Les autoridaes ruses punxeron en busca y captura a dos muyeres y un home presuntamente implicaos nel doble atentáu suicida cometíu esti llunes nel metru de Moscú.

"Toles comisarías y patrulles de la Policía tienen la descripción de les tres persones que podríen tar implicaes nel doble atentáu cometíu en Moscú", dixo la fonte. Coles mesmes, precisó que les dos muyeres, de 25 y 40 años, tienen traces eslaves y una d'elles llevaba una bolsa boluminosa, mientres l'home tendría unos 30 años y llevaba perilla.
  
Otra fonte del Serviciu Federal de Seguridá (FSB) indicó antes que les cámares de seguridá nuna de les dos estaciones de metru onde se produxeron los ataques grabaron xusto antes a les presuntes terroristes suicides entrando nel vagón al empar de dos muyeres de traces eslaves, según RIA Novosti.
  
La Fiscalía Xeneral de Rusia abrió un espediente penal por terrorismu, indicó la mesma axencia. Polo menos 38 persones morrieron y más de 60 resultaron firíes nes dos esplosiones que tuvieron llugar a hora punta de la mañana nes estaciones del metro de la capital rusa de Lubianka y Park Kulturi.
  
La Interpol ofreció la so ayuda a les autoridaes ruses pa investigar l'atentáu y prometió "apoyu y ayuda total". "El Centru de Comandu y Coordinación d'Interpol na sede del so Secretariáu Xeneral en Lyon, Francia, ta estrechamente en contactu cola so Oficina Central Nacional en Moscú p'apurrir l'asistencia que se requiera", dixo Interpol na so páxina web.
 
Dos esplosiones
 
La primer esplosión tuvo llugar na céntrica estación de Lubyanka, asitiada bien próxima a la sede de los servicios d'intelixencia rusos, y provocó polo menos 22 muertos y decenes de firíos ente los pasaxeros que taben dientro de los vagones y los que taben esperando nel andén.
  
La segunda esplosión tuvo llugar na tamién céntrica estación de metru de Park Kultury a les 8.38 hora llocal (6.38 hora asturiana), provocando la muerte a polo menos 12 persones.  
  

 

Contador Estadistiques