La Bandina va facer una presentación especial del so últimu discu

L’añu entama fuerte n’Asturies, polo menos musicalmente falando, ya que La Bandina esti día 2 de xineru tien preparáu daqué especial. Ello ye que’l grupu va facer presentación nel Teatru Filarmónica d’Uviéu del so últimu discu, “13”, conciertu nel que van contar con una bona riestra de collaboradores que grabaron nel discu, tanto asturianos como de fuera de les nuestres fronteres. Un conciertu d’esti tipu, nel que qu’hai xuntar y coordinar a un bon númberu de músicos nun xera fácil.

Tanto’l grupu como la so discográfica, tán faciendo un esfuerzu bultable pa que’l próximu día 2 de xineru tolos aficionaos al folk asturianu puedan ver un espectáculu de gran calidá. De mano, se va poder ver a La Bandina nun teatru, espaciu mui atopadizu pa disfrutar de lo que puede facer el grupu en directo. Dacuando, otros espacios como les nueches folk faen más difícil decatase de determinaos arreglos, técniques interpretatives o simplemente l’actitú del músicu enriba del escenariu ye diferente, el contestu tamién lo ye. Pero’l teatru ye un preba de fueu, una especie de exame, nel meyor sentíu de la pallabra, nel que l’espectador puede descubrir soníos del so grupu favoritu de los que nunca se decatara. Nesti sen ye mui recomendabla ver a La Bandina nesta situación, el discu ya diz muncho de la bayura d’arreglos que gasta la banda, pero velo en directo ye daqué obligatorio.

El conciertu va contar cola participación completa de toa La Bandina, Merce Santos (Zanfona) Santi Caleya (Gaita Asturiana, Saxo Sopranu) Toño Gomez (Trombón, Bombardino) Agustin Lara (Trompeta, Fliscornu) Juanjo Diaz (Tambor Asturianu, Caxón, Percusiones) Pablo Pumarada (Bodhram, Darbouka, Congues) Pedro Claro (Baxu) David Varela (Curdión Diatónicu, Voz), que ya de por si igüen una big band de gran potencia. Pero nesti conciertu tamién van participar bien de músicos que collaboraron nel “13”. D’Asturies va tar Alicia Álvarez (Pauline en la playa), que punxo voz y lletra al “Valse Coxu”, y Xosé Ambás, que foi la voz na danza “Nun vas sola”. Pero La Bandina rescampla pol pesu de les collaboraciones foriates, sobre too aquelles que vienen de la parte bretona d’Europa, y éstes nun van faltar a esta cita. Asina, nel conciertu va tocar una gran representación de músicos d’aquella parte. En primer llugar va tar un curdionista bien conocíu per Asturies, Alain Pennec, ún de los nomes de más sona nel mundu del curdión a nivel mundial. La nómina de collaboraciones estrastures complétase con Pascal Guingo, bretón campeón en repetíes ocasiones na modalidá pareya de bombarada y gaita bretona, Jean Michel Mahevas director de gaites de la banda Locoal Mendon, y finalmente Eric Quémerè y Joël le Guillant gaiteros de la banda Kevrenn Alré.

El conciertu, qu’entamará a eso de les 20:00 hores, tien una traza perinteresante, que se completa con un preciu de la entrada bien económicu, 6 €, a la venta de forma anticipada nel teatru Campoamor.