El Parlamentu asturianu aprueba'l presupuestu pal 2009

El Parlamentu asturianu aprobó güei'l Proyeutu de Llei del Principáu d'Asturies de Presupuestos Xenerales pal 2009, unes cuentes qu'algamaron los 4.394 millones d'euros, lo que significa un crecimientu del 7,68% en rellación a la suma total de los recursos conteníos na prollongación presupuestaria y les lleis de de midíes presupuestaries urxentes promovíes nel 2008.

Les cuentes aprobáronse güei dempués de que la Cámara refugare la pasada selmana, colos votos a la escontra de PSOE y IU, la enmienda a la totalidá del testu presentada pol PP. Güei, les dos formaciones qu'integren el gobiernu volvieron mostrar el so refugu a les enmiendes parciales presentaes pol grupu parlamentariu del PP.

El proyeutu aprobáu, que contó cola incorporación de diez enmiendes parciales presentaes de manera conxunta pol PSOE y IU-BA-Verdes, prevé que la rexón entre en recesión nel primer semestre y que l'añu acabe con crecimientu negativu. Poro, según esplicó'l conseyeru d'Economía y Facienda, Jaime Rabanal, el Gobiernu óptó por aumentar el recursu a la deuda.

Les cuentes contemplen amás que los ingresos fiscales baxen ente un 10 y un 12 por cientu y una inversión consolidada del sector públicu de 1.265 millones, un 12 por cientu más, lo qu'asitia en 1.172 euros la inversión por habitante.

No que cinca al gastu social, la sanidá va llevar 1.563 millones y la educación 954 mientres que la Conseyería con una mayor subida porcentual de los sos fondos va ser la de Bienestar Social y Vivienda, que va disponer de 379 millones, un 14,3 por cientu más que nel 2008.

Rabanal destacó na so intervención que se trata d'un presupuestu que "armoniza l'impulsu al desarrollu económicu y el caltenimientu del emplegu cola inversión social pa protexer a los ciudadanos y a les families asturianes". "Otorgar el votu favorable a esti Presupuestu ye dar apoyu al instrumentu que tien nes sos manes Asturies pa encarar la crisis económica", dixo'l conseyeru.

Pela so parte, el PP aseguró que'l Presupuestu ye ún de los instrumentos pa salir de la crisis pero non el principal, puesto qu'al so xuiciu'l principal ye da-y a los asturianos la posibilidá de salir de la mesma.

"La meyor receta pa la crisis ye nun engañase y esti presupuestu ye un engañu que parte d'una previsión falsa d'ingresos inflaos y con una previsión de deuda tamién falsa, porque va ser del doble de la que se diz", dixo'l diputáu 'popular', Joaquín Aréstegui.

Aréstegui indicó que van ser los propios asturianos los que mes a mes comprueben el próximu añu como'l presupuestu, nel que'l PP nun cree, "nun ye más qu'una ferramienta oxidada". Y ye que'l PP tamién acusó a Rabanal de mentir en cuanto a les previsiones de la evolución de la crisis n'Asturies.