UNA pide a los conceyos que se posicionen contra la incineradora

UNA solicitó a tolos conceyos que toeguen "el despropósitu que supón la incineradora apautada ente PSOE y PP”. Sicasí, la Federación de Conceyos vien d'apoyar la so construcción.

Pa UNA ye necesario que “tolos conceyos demuestren que sienten tanto una esmolición pola salú de los sos vecinos como pola so economía, porque l'importe de construir esta incineradora vamos pagalu tolos asturianos na tasa de recoyida de basures". Polo que Tino Fernández indicó que ”UNA sofitará nesti tema a tolos conceyos que voten en contra d'esti despropósitu, independientemente del so color políticu”.

Tino Fernández recordó que “la Unión Europea yá ta plantegándose sancionar al Estáu español pola alta contaminación n'Asturies, sobre manera na so zona central, como amuesa'l fechu de que teamos a la cabeza de les enfermedaes pulmonares n'Europa, creo que daquién debería esplicar esto a los ciudadanos”.

El miembru de la organización asturianista, recordó a PP y PSOE que la incineradora ye l'alternativa postrera que la UE plantega pa la xestión de residuos, dao qu'enantes habría qu'escosar les posibilidaes qu'ufierta “l'amenorgamientu, reutilización, reciclaxe y por últimu la valorización, tamién se destacaba qu'ente les posibles valorizaciones la incineración ye la peor de les mesmes, primero habríen que s'escosar víes como la xeneración de biogás o biodiesel”.
 
UNA considera'l nun escosar otres alternatives “una amuesa más de que tres de la incineradora s'escuenden intereses ayenos a Asturies, darréu qu'enantes o depués la construcción d'esti monstruu va xeneranos problemes cola UE y va ser cuasi imposible la so utilización al 100% con residuos asturianos cuando s'apliquen les midíes nel tema de residuos qu'esixirá la Unión” polo que pal voceru de medioambiente nacionalista “va suponer que pa xustificar la so construcción incineraremos basories d'otres partes, convirtiendo a Asturies nel vertidoriu del estáu”.

Pa cabu, dende UNA esixen a los socios de gobiernu del PSOE que seyan coherentes coles sos repitíes declaraciones en contra de la incineradora, “porque nesti tema nun caben indiferencies y nun pue dar el mínimu fuelgu al que quiera llevar a cabu esti despropósitu, que va incidir mui negativamente nel presente y futuru d'Asturies”.
 
La Federación de Conceyos da "apoyu unánime"
 
La Comisión Executiva de la Federación Asturiana de Conceyos (FACC) mostró güei'l so "apoyu unánime" a la construcción d'una planta incineradora n'Asturies, cuestión que va decidir el Consorciu pa la Xestión de Residuos Sólides n'Asturies (Coxersa). Asina lo espunxo güei, en rueda prensa, el presidente de la FACC, Juan Fernández Pereiro, que tamién señaló que los dos representantes d'IU-BA-Verdes na Executiva, que se compón de 17 miembros, nun tuvieron güei presentes na xunta.

Los miembros de la Executiva tuvieron como referencia un informe de la Comisión de Mediu Ambiente de la FACC, qu'a últimos de febreru caltuvo una xunta de trabayu cola xerencia de Coxersa. Según Pereiro, ye importante que nel desarrollu d'esti plan los conceyos nun se vean afeutaos nin nel so endeudamientu, nin tengan qu'apurrir nada pa la so construcción. El costu deberá repercutir asina nel recibu de la tasa de basura. Una subida que Pereiro confía que seya "asumible".