L'alcaldesa de Peñamellera Alta tresllada al Principáu la problemática de les llinies d'alta tensión nel conceyu

|

L'alcaldesa de Peñamellera Alta (PP), Rosa Domínguez de Posada, y el diputáu rexonal, Juan Ángel Bustillo, caltuvieron esta mañana un alcuentru col director xeneral d'Enerxía y Minería del Principáu d'Asturies, Isaac Pola Alonso, col oxetu de tresllada-y la problemática existente nel conceyu de Peñamellera Alta coles llinies d'alta tensión.

Nel trescursu de la xunta los dirixentes populares treslladáron-y el grave impautu que sufre Peñamellera Alta con cuatro llinies d'alta tensión, dos de 220 Kw, una de 132 y otra de 400.000 Kw.

L'alcaldesa señaló la necesidá de trabayar na compautación de llinies col oxetu d'amenorgar el grave impautu medioambiental, asina como solucionar los problemes nel barriu del Cao, pol que s'accede lliteralmente perbaxo d'una de les columnes de torres d'Alta Tensión.

De la mesma manera, los dirixentes populares tamién reclamaron modificar puntualmente el trazáu de la llinia de 132 Kw que pasa penriba del polideportivu municipal col fin de poder cubrir diches instalaciones deportives.

Rosa Domínguez de Posada y Juan Ángel Bustillo algamaron el compromisu del Gobiernu rexonal de dar treslláu de toos estos pidimientos a REE como a EON, propietaries de les llinies d'Alta Tensión, pero'l director xeneral d'Enerxía y Minería yá-yos indicó la imposibilidá de soterrar na so totalidá les llinies d'Alta tensión pol so altu coste económicu.

Contador Estadistiques