Tres la sentencia del Xulgáu d'Uviéu, l’Academia esixe la oficialidá como “cuestión urxente y de llexítima xusticia”. La Xunta, amás, califica de pergrave l'actitú del Principáu.

L’Academia de la Llingua Asturiana entiende que la sentencia pola que se refuga’l derechu de los funcionarios al usu del asturianu nes sos rellaciones col Principáu, va dafechamente a la escontra del espíritu y la lletra del Autu del Constitucional qu’afitaba que tolos ciudadanos, al marxe del so llabor profesional, se pudieren empobinar nesta llingua a los muérganos del Principáu.
 
Pa la institución esto ye una sorprendente decisión que fraya los principios llegales calteníos na Llei d’Usu del Asturianu y l’Artículu 4.2 de la mentada llei, “onde se conseña la validez del emplegu d’esta llingua nes comunicaciones orales o escrites de los ciudadanos col Principáu d’Asturies”.
           
“Si yá ye percurtiu’l conteníu de la Llei d’Usu y non homologable al del restu de comunidaes del Estáu con llingua propia, entá lo ye más na so puesta en práutica, darréu que les instituciones de gobiernu y los muérganos xurisdiccionales actúen mesmamente a la escontra de lo afitao na mentada Llei”, afirma l’ALLA.
 
Pa la institución, casos como esti amuesen que si fai falta la oficialidá, “a la contra de los que dicen dalgunos políticos, porque n’Asturies nun hai garantía de que los derechos llingüísticos se puean exercer con llibertá y ensin imposiciones”. Amás, reseñen que la sociedá ta dafechu madura p’acoyer una oficialidá consensuada, non traumática y afayada a la propia situación sociollingüística de la comunidá.
 
La institución recuerda’l desendolque de la llingua asturiana n’aspeutos como’l normativu, l’espoxigue de la lliteratura, la presencia escolar, l’emplegu n’ámbitos culturales y musicales, l’axuste a les nueves necesidaes comunicatives y a les nueves teunoloxíes, “como la meyor preba de qu’un procesu d’oficialización del idioma nun xeneraría nengún tipu de rocea social”.
 
La Xunta esixe la oficialidá
 
Mientres, pa la Xunta pola Defensa de la Llingua, vuelve a resultar evidente que, mentes nun se reconoza de manera clara la oficialidá, los derechos llingüísticos de los ciudadanos van siguir dependiendo de les interpretaciones, “siempre restrictives”, de los socesivos Gobiernos y de los sectores más conservadores de la xudicatura.
 
Pa l’asociación, el marcu xurídicu d‘anguaño dexaría avanzar en munchos campos de la normalización social, “pero siempre qu’hubiera una voluntá a favor d’interpetar de manera arrogante esi marcu xurídicu y nel Gobiernu asturianu queda demostrao que nun hai esa voluntá.
 
La Xunta diz que ye llamativa la resolución del Xulgáu de lo Contencioso-Alministrativu nº3 d'Uviéu que tornó’l recursu presentáu por Xurde Blanco, “cuando foi precisamente esti xulgáu’l que-y preguntó al Constitucional si l’artículu cuartu de la Llei d’Usu yera constitucional y la respuesta del TC nun dexaba dulda”.
 
“Sicasí, el xuez desói’l dictame del TC y resulta preocupante, amás, que’l xuez diga que’l funcionariu parez que namás quier interferir nel bon funcionamientu de l’Alministración y que la so actitú merecía una corrección disciplinaria”, esclarien dende la organización de defensa del idioma.
 
Amás, dende la Xunta ven tovía más escandalosa l’actitú del Principáu, “que valora la sentencia como un ésitu y diz que nun se conculcó nengún derechu nin se-y dio un tratu desigual al funcionariu”.
 
“Si un ciudadanu, funcionariu o non, reclama poder dirixise a la so Alministración na so llingua, derechu que-y reconoz la llei y el Constitucional, y nun pue, ¿nun se conculcó nengún derechu?”, entreguen pa finar.