El Consorciu Cívicu vien de solicitar a tolos conceyos que la decisión sobre la incineradora seya aprobada pol Plenu municipal. Mientres que la Coordinadora ecoloxista diz que cada vez tamos más lloñe d’Europa nos datos de reciclaxe.

Énte la próxima convocatoria d'una Xunta Estraordinaria de Coxersa, na que se van tomar les decisiones necesaries pa empecipiar el procedimientu pa la instalación d’una incineradora en Serín, Ecoloxistes n’Aición d’Asturies, en nome del Consorciu Cívicu solicitó a la totalidá de los conceyos del país, que pa que la posición que sofiten los representantes de los conceyos nesa Xunta, seya lo más representativa ya independiente posible, esa posición tendría de ser primeramente aldericada y aprobada pol plenu del Conceyu, “como órganu de máxima representación política de los ciudadanos nel gobiernu municipal”.
 
El Consorciu Cívicu ta formáu pola Asociación pa la Defensa de la Sanidá Pública, la Confederación d'Asociaciones de Vecinos, la Unión de Consumidores d'Asturies y Ecoloxistes n’Aición d’Asturies, qu’afirmen que la instalación de la incineradora va marcar mientres décades, “tantu dende'l puntu de vista económicu, como ambiental”, el futuru del tratamientu de les borrafes xeneraes n’Asturies.
 
“Asturies más lloñe d’Europa”
 
La Coordinadora Ecoloxista tamién acaba de dar a conocer, d'alcuerdu a los últimos datos publicaos por Eurostat, qu’Asturies allóñase mas cada vez d'Europa no que cinca'l reciclaxe. Los ecoloxistes apunten que mientres n'Europa reciclen de media un 23%, n'Asturies solo reciclamos el 9%, mientres que n'Europa incineren de media'l 20% n'Asturies quieren incinerar el 85%, y que mientres n'Europa comporten el 17%, n'Asturies preven solo'l 5% por mor de la incineradora.
 
Pa la coordinara ye importante señalar qu’un de los argumentos de la construcción d’una incineradora “nel centru de la rexón mas contaminada d'España” ye averanos a Europa, “a la vista d'estos datos ta claro que cada vez vamos tar mas lloñe”. Amás, afirmen que la instalación que quieren facer incumple toles normatives esistentes, n'Asturies (Plan Básicu de Xestión de Borrafes), n'España (Llei de Borrafes) y n'Europa (Direutiva de Borrafes). 
 
“Una vegada más manifestamos que la xestión de les borrafes urbanes precisa d'una combinación de soluciones partiendo de la política de les 3 R, amenorgar, reutilizar y reciclar, nunca destruyir quemando porque esta política ye peligrosa, cara y destructora de recursos llindaos como los que tenemos nes borrafes”, comenten pa finar.