El diputáu d'IU-BA-Verdes na Xunta Xeneral convidó al PP a apoyar a la so coalición na defensa del Plan del Prerrománicu, qu'inclúi la supresión de la llosa de Santuyano.

"Esti plan ellaboráu por Nanclares y Capitel opónse a la construcción de la Llosa de Santuyano, a los pies de la ilesia de Santuyano de los Praos, llosa que promueve l'alcalde d'Uviéu, Gabino de Lorenzo, tamién del PP".  
  
De la mesma, señaló Colunga nuna nota de prensa, el Plan del Prerrománicu inclúi un entornu de protección de la fonte Prerrománica de Foncalada, "entornu que se saltó a la torera'l Conceyu d'Uviéu autorizando una discoteca a escasos metros, y con intención d'otorgar más llicencies".
  
Nesti sen, el diputáu d'IU-BA-Verdes destacó tamién la construcción d'una vivienda, cola llicencia del Conceyu, nel entornu de Santa María del Naranco.
 
Unificación de Turismu y Patrimoniu Cultural
 
El Gobiernu del Principáu va unificar dos de les direiciones xenerales adscrites a la Conseyería de Cultura y Turismu, la de Turismu y Patrimoniu Cultural. Failo pol cese, por pidimientu propiu por motivos personales, de l'hasta agora titular de la primer de les direiciones, Elisa Llaneza.
  
La conseyera d'Alministraciones Públiques y vocera del Gobiernu, Ana Rosa Migoya, esplicó na rueda de prensa posterior al conseyu de Gobiernu, que va ser l'actual responsable de Patrimoniu Cultural, José Luis Vega, el que se ponga al frente la nueva direición xeneral unificada.