Más de 60 llagares participen nel festival 'La primer sidre l'añu'

Xixón va acoyer el festival ‘La primer sidre l’añu’, nel que van participar 60 llagares, convirtiéndose nel más grande del país y onde l’asturianu va ser l'idioma de toles actividaes.

El Salón de Recepciones del Conceyu de Xixón acoyó ayeri la presentación del festival”, que se va celebrar nel Muséu del Pueblu d'Asturies los próximos díes 2, 3 y 4 d'Abril. L'actu de presentación cuntó cola presencia de Llucía Marqués, de la revista ‘La Sidra’, el gaiteru Llorían García, Jesús Montes Estrada, Conceyal de Cultura Tradicional y Política llingüística, l’asesor de la conceyalía, Jorge Espina, y José Manuel Sariegu, en representación de l'Alcaldesa de Xixón, que s'atopaba n'otra actividá.
 
Llucía Marqués reseñó la presencia na presentación de distintes estayes de la vida social y cultural d'Asturies, ente los que destacaba'l Campeón del Mundu de Piragüismu Manuel del Bustu, que va ser el pregoneru del certame.
 
Marqués esplico que con esti festival “pretendemos recuperar lo que tradicionalmente significaben les espiches, que yera cuando los llagares, industriales o domésticos, abríen los toneles y ufiertaben la so primer sidra al públicu”. Tamién resaltó'l carácter del festival como agroalimentariu, “porque la sidra ye de baxa graduación y nun se tien qu’acatar a la llexislación de bebíes alcohóliques”.
 
El Festival va tener tamién actividaes lúdiques y culturales, asina como demostraciones gastronómiques. A les sesiones de deportes tradicionales y partíes de bolos, van xunise prebes de productos derivaos de la sidra y un cursu d'escanciáu impartíu pola campeona Loreto García.
 
Amás, paralelamente al Festival, va celebrase l'amuesa “Asturianada y sidre”, que va xunir dambes cuestiones, “el chigres siempre foi escuela de cantaores”, tal qu’esplicó'l gaiteru Llorián García. Esta amuesa de tonada va cuntar con participación de “xente mozo que presente propuestes nueves ya innovadores, pero al empar va cuntar cola presencia de primeres espaes de la tonada, como Mari Luz Cristobal, Anabel Santiago o Carlos Rubiera, ente otros”.
 
Llorían García esclarió que los cantaores van interpretar tonaes arreyaes al mundu de la sidra y que’l certame tien la finalidá de potenciar la presencia del idioma del país, “potenciar que canten y compongan tonaes n’asturianu”.
 
Pero según esplicó l'asesor de la conceyalía, Jorge Espina, “nun se trata de competir ente unos festivales y otros, sinón de poner en valor un productu tan amestáu a la cultura asturiana como la sidra”, Amás Espina reseñó la vinculación de la sidra cola llingua asturiana, “toles actividaes van desendolcase nesti idioma”.
 
A lo último, l'asesor señaló la voluntá de continuidá d'esta iniciativa, y l'oxetivu de que'lMuséu del Pueblu d'Asturies seya “más qu'un espaciu espositivu, sinón como una amuesa interactiva de la cultura y la tradición asturiana”.