Los ecoloxistes opónense al proyeutu d'introducción del frangüesu

Cinco coleutivos ecoloxistes asturianos opónense al proyeutu d'introducción del frangüesu en Picos d'Europa porque "nun tien consensu tanto n'Asturies como n'Aragón".

Pa los grupos firmantes, el plan "nun cuenta col apoyu favorable de la Unión Internacional pa la Conservación de la Naturaleza (UICN), nin del Conseyu Superior d'Investigaciones Científiques (CSIC)".
  
Nuna nota de prensa, el Grupu d'Ornitoloxia Mavea, la Coordinadora Ecoloxista d'Asturies, Amigos de la Naturaleza Asturiana- ANA, l'Institutu pa la Calidá y la Educación Ambiental y el Coleutivu Ecoloxista d'Avilés aseguren que solo la Fundación pa la Conservación del Frangüesu y dellos políticos aragoneses y asturianos apoyen el proyeutu, que nun tien amás de financiación comunitaria.
  
Nel testu espliquen que los frangüesos que se quieren introducir n'Asturies provienen de ñeros monteses de los Pirineos y llamenten que n'Aragón la FCQ tien "carta blanca" pa garrar de los ñeros de frangüesos los güevos y pitos que vea convenientes, nun procesu "bien poco tresparente".
  
Los ecoloxistes recuerden que "la población pirenaica de frangüesos atópase nun delicáu estáu de conservación" y encamienten que se faigan esfuerzos destinaos a lluchar contra los problemes que sufren, ente los que citen los venenos y la falta d'alimentu. "Pa nada ta xustificao que se-yos retiren güevos y pitos de los ñeros pa destinalos a introducilos n'otra rexón", caltienen.
 
Amás, consideren que la sobrevivencia d'estos frangüesos en Picos d'Europa ye "más que cuestionable", pues permanecen los cebos envenenaos, que constitúin, al so entender, la primer razón pa la so estinción.
  
Los conservacionistes almiten que nun añu "preelectoral" los proyectos qu'impliquen a especies emblemátiques resulten atractivos, pero creen qu'ello nun xustifica "esquilmar la población pirenaica de frangüesos en declive, la suelta de los exemplares nun llugar sin garantíes de sobrevivencia y a cuenta del caltenimientu d'otres especies amenazaes d'estinción", como l'osu cantábricu y el gallu montés.