Pa l’Academia nun hai perres

El Senáu aprobó solicitar una asignación añal del Estáu pa la RAG. Asina, l’ALLA va ser la única institución llingüística ensin asignación añal nos presupuestos del Estáu.

La moción ye una reivindicación de Xosé Luis Méndez Ferrín dende que foi nomáu presidente de la RAG, y respuende a un cambiu d'un testu inicial ellaboráu pol senador pol Grupu Mixto José Manuel Pérez Bouza, que pertenez al BNG, nel qu'ésti pidía al Executivu la concesión pa estiu d'una sovención nominativa de 750.000 euros a la Real Academia Galega "pa compensar la situación de discriminación nos Presupuestos del Estáu del 2010".
  
Sicasí, el senador socialista Pablo García propunxo una enmienda de sustitución a la moción que nun inclúi nenguna partida y que Pérez Bouza aceptó, esplicando que va ser el Ministeriu d'Educación el que valore la cantidá a destinar esti añu a l'academia, y el restu de grupos apoyó.
  
Concretamente, el testu aprobáu encamienta al Gobiernu que "contemple la inclusión de la Real Academia Galega na partida de creitos a reales academies del presupuestu del Ministeriu d'Educación pa que, xuntu cola española y les instituciones análogues catalana y vasca, puea tener les mesmes prerrogatives y disponer d'una asignación añal, al envís de poder realizar programaciones estables y cola seguridá d'una financiación adecuada al importante llabor que realiza".
  
Na so defensa de la moción, el senador del BNG manifestó que la so intención ye "acabar con una situación discriminatoria y inxusta" con una institución que se dedica "a la promoción y estudiu del gallegu", puesto que denunció que l'Institutu d'Estudios Catalanes o la Real Academia Vasca sí cuenten con una partida fixa añal nos Presupuestos Xenerales del Estáu (PGE) y l'academia gallega namás recibe sovenciones.
  
En remarcando que la so intención con esta moción nun ye cuestionar la financiación de los institutos catalán y vascu, Pérez Bouza sorrayó que'l so oxetivu ye atopar una "situación d'igualdá porque l'Estáu tien la obligación de protexer toles llingües del Estáu".
  
Asina se pronunció tamién el senador García, que consideró la inclusión de la Real Academia Galega nes partíes del Ministeriu d'Educación como una "deuda pendiente, non yá económica, sinón moral y de dignidá".
  
Sicasí, la senadora popular María Jesús Sáinz llamentó que'l Grupu Socialista "tarazara" la moción inicial del BNG, eliminando'l pidimientu de subvención de 750.000 euros pa esti añu, y recordó qu'el so grupu presentó nel 2005 una moción semeyante na que tamién s'encamentaba al Gobiernu a destinar una sovención a la Real Academia Galega por esta mesma cantidá.
  
Según Sáinz, "la Real Academia Galega ta siendo llamentablemente discriminada", pues nun cuenta con una asignación fixa dende que nel 2006 estableciéronse les partíes pa los institutos vascu y catalán dientro de los PGE. Poro, preguntó al Grupu Socialista qué llevó al presidente del Gobiernu, José Luis Rodríguez Zapatero, a "discriminar una vez más a una institución gallega" y si "ési ye'l Gobiernu solidariu que diz que tenemos".
 
El casu asturianu
 
El presupuestu de l’Academia de la Llingua Asturiana en 2010 ye de 230.000 euros, un 8% menos que l’añu anterior. Sicasí, na presentación de los presupuestos el pasáu avientu, la Conseyera de Cultura, Mercedes Álvarez, señaló que ye un presupuestu “que-y permitirá desendolcar tola so actividá con criterios d’aforru”.
 
Esa actividá son decenes de llibros de 26 coleiciones diferentes, les xornaes d’estudiu, concursos lliterarios, recoyida de material, los trabayos na gramática y los diccionarios, amás d’otros trabayos normativos, como’l recíen estrenáu Centru de Terminoloxía Asturiana.
 
Una de les mayores reivindicaciones de l’ALLA ye un llar social acordies cola importancia de la institución. Yá que na actual sede, un pisu na uviéina cai Marques de Santa Cruz, l’Academia nun tien espaciu pa una biblioteca y un depósitu de llibros. L’actual llar, estrenáu en 1983, diba ser, yá daquella, dalgo provisional a la espera de les tresferencies a la Conseyería de Cultura.
 
El total del presupuestu de la Conseyería de Cultura pa 2010 ye de 117,8 millones d’euros, 19,7% menos qu’en 2009. Y de cada diez euros d’esi presupuestu, ún va pal Centru Cultural Niemeyer d’Avilés, que dende’l Principáu cuenten abrir esti añu.