El Garrapiellu celebra venti años “faciendo conciencia”

|

El Garrapiellu cumple venti años “faciendo conciencia nuna Asturies desnortiada y lluchando pa que la xente defenda'l so patrimoniu y la so identidá”, en pallabres d'Ánxel Nava.

L’asociación de defensa del patrimoniu cultural asturianu, ufrió una rueda de prensa en Xixón pa facer balance de los sos venti años d’historia, una conmemoración que s’engloba baxo l’eslogan ‘El Garrapiellu, 20 años faciendo conciencia’. Na mesma participaron los miembros de la direutiva Ánxel Nava, Sixto Armán y el so presidente, Tino Lozano, quien afirmó que l’asociación entamó como una xuntanza d’amigos, “tomando unes cerveces”.
 
El Garrapiellu quier agora tresmitir a la sociedá la importancia de conservar ya involucrase na defensa del patrimoniu, “un patrimoniu que ye de toa ciudadanía, non de los políticos”, según Ánxel Nava. Ye un trabayu qu’ello lleven faciendo too esti tiempu, “organizando olimpiaes de xuegos tradicionales, actividaes pedagóxiques nos colexos, participando en Mercaplana, faciendo concursos lliterarios o defendiendo la llingua asturiana en Bulgaria, nel Conceyu de Cultura Inmaterial de la Unesco”, apuntó Nava.
 
Pa la seronda y probablemente nel Antiguu Institutu, “si cuntamos col sofitu necesario”, esperen celebrar una esposición antolóxica sobre l’asociación. Una actividá que quieren enmarcar nuna selmana cultural na que quieren reflexonar sobre’l pasáu, el presente y el futuru d’Asturies.
 
Según Sixto Armán nun va ser un programa festivu nin nostálxicu, “ye de compromisu col futuru de la nuesa cultura, un ámbitu problemáticu que les alministraciones tienen la obligación de conservar”. Con estes actividaes quieren compartir una reflexón unitaria y crítica, “recuperar ilusiones ya iniciatives, sumando esfuercios pa que’l patrimoniu quede pa les xeneraciones futures”, afirmó Armán.
 
Tino Lozano dixo que’l Garrapiellu siempre tuvo al llau de los vecinos de la zona rural, y asina aprovechó la rueda de prensa pa esixir que los autobuses sigan llegando a la zona rural de Xixón, “ye un serviciu públicu que tien que funcionar anque seya namás pa un vecín”.
 
Un trabayu de defensa del patrimoniu y les persones, que según Tino Lozano nun depende de les subvenciones. “Paez que con elles tán toos callaos, tenemos que despertar a la sociedá civil, somos la sociedá los que tenemos que sacar los colores a los políticos”, esclarió.
 
Pa conmemorar l’aniversariu, l’asociación asturianista va entamar una espicha nel Llagar de Viñao de Xixón, el próximu vienres a les 20.30 hores, onde quieren convidar a tolos socios y a tola xente que collaboró puntualmente con ellos nestos venti años.

Comentarios

Toa  amiracion  pa ellos ye pocu, pol trabayu que facen en   pro de lo nuesu!!    Par tirar  de la xente el comprexu  metiu na cabeza.
Pa recordayos  que Asturies non  ye una provincia de Castiella.Y  la  nuesa cultura ye  asina mui nuesa!!!

Contador Estadistiques