Palacios respeta a Valledor y diz que cola incineradora acabó un ciclu

Rafael Palacios manifestó respetar al máximo la decisión que puea adoptar García Valledor y diz que col pautu ente PSOE y PP sobre la incineradora "acaba un ciclu políticu".

Palacios, en declaraciones a Europa Press, indicó que la incineradora va afeutar a más a de 800.000 asturianos y tachó de "miserable" l'acuerdu alcanzáu ente PSOE y PP, a los que fizo responsables de "envenenar a la población y amás sabiéndolo".
 
Coles mesmes, calcó en que l'alcuerdu per parte del PP taba basáu "na miseria más absoluta", dao que na so opinión namás queríen facer negociu pa les cementeres. Nesti sen, alvirtió qu'el so partíu va encargase de qu'esto se sepa, puesto que "los responsables tienen nome y apellíos". Amás señaló que l'alcuerdu ta claru que debilita la relación ente les organizaciones polítiques y el Gobiernu de coalición. "Esto demuestra qu'hai un ciclu políticu qu'acabó", apuntó.
  
Pa Palacios "nun hai proyeutu de país nin voluntá de sirvir a los asturianos sinón sirvise d'ellos". Por ello, adelantó que va haber que reflexonar y ver el papel de los Conceyos nel plenu de Coxersa, señaló.
  
Al so xuiciu la decisión adoptada ye "una vulneración mui grave de la llei", puesto que tendría de ser la incineradora l'últimu recursu. Palacios llamentó que n'Asturies nun se dessarrolla nenguna de les otres alternatives. Coles mesmes indicó "que s'abre un panorama políticu realmente complicáu" y apuntó que Bloque per Asturies va analizar "con calma lo asocedío pero teniendo en cuenta la gravedá de la decisión que xuega cola salú de los asturianos".
 
Moción contra la incineradora

IU-Corvera presentó una moción pa debatir nel plenu del próximu 30 de marzu nel que refuguen la construcción de la incineradora y encamienten adoptar una política de reciclaxe. Argumenten que la construcción d'esta infraestructura "supón un grave atentáu pa la salú de tola zona central, supón un riesgu comprobáu y evidente, pa la salú de les persones que viven nel entornu más próximu".
 
Espón amás que la incineración de residuos supón l'apaición de "nuevos problemes ambientales y sanitarios" de la que recuerda que "la calidá del aire ye la peor d'España, tenemos  el nivel mas altu de morbilidá ambiental d'España, y encabezamos el ranking n'enfermos de cáncer".

La incineradora ye incompatible colos programes de recuperación, reciclaxe y compostaxe. Entiende que la incineración de la basoria produz "gases cargaos de dioxines, furanos y metales pesaos, amás de residuos sólidos d'altu conteníu tóxicu y de diversidá tala que munchos son tovía poco conocíos".
  
Per otra parte, IU alude a que la construcción de la incineradora supón una inversión superior a los 250 millones d'euros y el preciu pola xestión de tonelada de basura "va aumentar un 600% nel meyor de los casos". Indica que de los actuales 12 euros pasaría a 80 euros, "nel meyor de lo casos, pudiendo llegar a los 120 euros como cobren en Mallorca".