Proponen un dictame que da al Parlament poder de referendu

Presenten un dictame sobre la Llei de Consultas Populares qu'afirma que ye'l Parlament quien tien que decidir si se pue convocar un referendu sobre la independencia de Cataluña.

En rueda de prensa, el diputáu d'ERC nel Parlament y voceru de l'asociación que presentó'l dictame, la Coordinadora Nacional pa la Consulta sobre la Independencia, Uriel Bertan, dixo que'l referendu podría convocase si hai "voluntá política" per parte de los grupos de la cámara.
  
"Les lleis tienen un marxe en función del qu'ostenta la mayoría política. Ye un instrumentu políticu que se pue utilizar, y ye una estratexa llegal en función del puntu de vista de la Mesa del Parlament", sorrayó.
  
Bertran apuntó que tienen la intención de promover una iniciativa popular pa que'l Parlament convoque'l referendu nel 2011, cuando acaba la fola de consultes sobre la independencia cola última que ta prevista en Barcelona -ensin fecha concreta inda-, añedió.
  
Señaló que nel próximu plenariu que va celebrar la Coordinadora n'abril van plantegar esta iniciativa a les comisiones locales pa debatir y votar esta cuestión, anantes d'entamar la recoyida de firmes pa solicitar el referendu, nun procesu que podría prollongase unos 6 o 8 meses, dixo.
  
El diputáu republicanu aseguró que nel Parlament hai una mayoría a favor del drechu d'autodeterminación, y el dictame encargáu pola Coordinadora afirma que si la Cámara catalana acepta celebrar el referendu nun hai nenguna norma del Estáu que lo torgue directamente, asegurando que nesti casu prevalez el drechu internacional.
  
La Coordinadora encargó al profesor de la Universidá de Standford (EEUU), el doctor Antoni Abad, esti dictame sobre la Llei de Consultes Populares y sobre'l drechu internacional vixente pa promover un referendu d'independencia convocáu pol Parllamentu.
  
Anunciáronlu depués de qu'esta llei s'aprobare na Cámara col apoyu del tripartitu y el refugu de CiU, PP y C's. La normativa regula esti tipu de consultes sobre temes d'especial trescendencia pal conxuntu de Cataluña y tamién les consultes d'ámbitu municipal, toes cola autorización previa del Estado.
  
Pa la Coordinadora, el dictame ye'l primer pasu pa tratar la promoción de la convocatoria d'un referendu independentista, como aprobaron nel Conseyu Plenariu d'Arenys de Munt (Barcelona) que celebraron n'ochobre del 2009.
  
La entruga que proponen dende la Coordinadora pal referendu independentista, en casu de que'l Parlamentu lo aprobara, sería: "¿Ta d'acuerdu en que la nación catalana torne nun Estáu de drechu, independiente, democráticu y social, integráu na Unión Europea (UE)?".