Tres años d’asturianu na TPA

Van cumplise tres años del estrenu de los primeros programes n’asturianu na TPA, espacios afalagaos pola audiencia. Sicasí, la cuota d’asturianu de TPA lleva conxelada dende la fecha.

Foi’l 29 de marzu de 2007 cuando’l Direutor Xeneral de la RTPA, José Ramón Pérez Ornia, presentó los primeros programes n’asturianu. Tratábase de ‘Camín de cantares’, ‘Pieces’, ‘Nós’ y ‘Al aldu’ (un contenedor compuestu polos espacios ‘A galmiaes’, ‘Recetes con cuentu’, ‘La risión’, ‘Xente de casa’ y ‘Axenda d'Asturies’). L’oxetivu d’estos espacios según el propiu Ornia, yera normalizar l’usu del asturianu y contribuyir al so conocimientu.
 
De tolos programes foi ‘Camín de cantares’ el que más espectadores tuvo, convirtiéndose xunto ‘Conexión Asturias’ nel programa-emblema de la canal. L’espaciu producíu por Ámbitu Audiovisual y conducíu por Xosé Antón Fernández ‘Ambás’, baxo la direición de Ramón Lluis Bande, llegó algamar medies d’audiencia del 30,2%, consiguiendo cuotes de share namás superaes por tresmisiones de partíos del Sporting.
 
Anguaño, el programa yá emitió la so quinta temporada, saliendo per primer vez fuera de les llendes d’Asturies, llegando a zones lleoneses asturfalantes. Próximamente estrenaran la sesta temporada, cola que cuenten poner pieslle a un programa que yá pasó a la historia de la televisión asturiana.
 
Un añu depués del estrenu de lo que munchos calificaron como “requexu del bable”, la RTPA celebró’l primer añu de programes n’asturianu roblando un conveníu de collaboración cola Academia de la Llingua Asturiana, presentando’l doblaxe al asturianu de 145 capítulos de ‘El Cuentacuentos de Presta Esgaya’ (primeru foron emitíos en castellán) y anunciando’l posible entamu d’una escuela de doblaxe cola sida de dotar a la TPA de programes de ficción nel idioma del país.
 
Naquella xornada, Ornia calificó d’ésitu l'audiencia algamada pola programación n'asturianu nel primer añu. Un share mediu que foi del 11'8%, pasando en cinco puntos la media de la programación de la cadena, que yera d’un 6'8%. El propiu direutor del Ente reconocía nuna rueda de prensa ente la presidenta de l’Academia, Ana Cano, que l’audiencia de la canal duplicábase cuando s’emitíen programes n’asturianu, afitando qu’esistía una demanda evidente de la sociedá que facia que la TPA tuviera “obligada a siguir trabayando na producción de programes n'asturianu”.
 
Sicasí, namás se supo de la escuela de doblaxe, de más espacios d’asturianu y del conveniu cola ALLA. Según la propia presidenta de la institución, Ana Cano, los alcuerdos de collaboración acaben derivando, munches vegaes, en daqué protocolario y quédense en declaración d'intenciones con pocu valir. “Esti paez ser el casu, hai propuestes de proyeutos conxuntos, básicamente formativos, qu'inda nun se punxeron en marcha y que dependen del determín y enfotu de la RTPA. Otres cuestiones de calter téunicu van llevándose a cabu y, otres, más simbóliques, como la tresmisión diferida del actu del Día de les Lletres son una realidá”, señala Ana Cano.
 
El conveniu recoyía, amás de la parte formativa, la organización de xornaes, seminarios y cursos, promoción de servicios y actuaciones d'esparcimientu de la llingua empobinaes a los titulaos en periodismu de recién, asina como al restu de profesionales del ámbitu televisivu.
 
Con too, enantes de la robla del conveniu yá hubo esperiencies formatives pa los periodistes de la RTPA. Asina, en 2007 la Oficina de Política Llingüística de Ramón d’Andrés entamó un ‘Cursu d’asturianu faláu pa Profesionales de la RTPA’, qu'en 40 hores y en collaboración cola propia RTPA, pretendía dar unos conocimientos mínimos d’asturianu a los periodistes que s’encargaben de les xeres informatives.
 
Agora, según les pallabres d’Ana Cano, l'ALLA va facer una pitición espresa a la RTPA pa estudiar el grau de cumplimientu del alcuerdu y ver cuáles son les posibilidaes futures y reales de collaboración. “Y equí tendremos propuestes concretes que facer”, apunta la presidenta.
 
Poco más dieron de si cuatro años d’emisión d’espacios n’asturianu, llindaos tovía anguaño a los cuatro programes presentaos en 2007. A los qu’hai que sumar les gales del programa ‘Sones’, qu’emite los domingos pela nueche, n’horariu de máxima audiencia y llegando algamar cuotes al rodiu del 10% de share. Concursos de tonada, monográficos musicales, el Premiu al Meyor Cantal o la Muestra de Folclor Ciudá d’Uviéu tienen cabida nesti espaciu musical n’asturianu, anque munches vegaes los programes son presentaos en billingüe o los creitos del programa avecen dir en castellán, ensin muncho procuru llingüísticu.
 
Tamién quedaron atrás ‘5 minutos’, una serie de diez espacios de ficción basaos en testos d’autores contemporáneos fechos cola sida de conmemorar la Selmana de les Lletres de 2007, dedicada a la nueva narrativa. Amás de les tresmisiones en direuto de la misa de San Pedrín de la Cueva, tolos branos dende Sariegu, o la emisión de madrugada de la Xunta Estraordinaria de l’ALLA, cola que la TPA vien “celebrando” los dos últimos díes de les lletres asturianes.
 
Nula presencia tien anguaño l’idioma del país dientro de la información, los deportes o la programación infantil, tres la fin de los 145 capítulos de ‘El Cuentacuentos de Presta Asgaya’. Pa denunciar los fechos, la Xunta pola Defensa de la Llingua Asturiana tien entamada una campaña de ‘mailing’ a la RTPA, consistente n’unviar un corréu xenéricu a los principales direutivos del Ente públicu esixendo una mayor presencia del asturianu dientro de la programación de la canal.