Un soldáu israelín muerre nun enfrentamientu con milicianos

Un soldáu israelí resultó muertu ayeri nun enfrentamientu armáu colos milicianos palestinos na frontera cola Faza de Gaza, según informó la canal de televisión Al Arabiya.

Amás, tres infiltraos gazacís resultaron deteníos poles fuerces hebrees mientres dichu enfrentamientu, según informó'l Canal 10 de la televisión israelina.
  
L'Exércitu israelí nun fixo nengún comentariu sobre la información publicada por Al Arabiya sobre la muerte d'ún de los sos soldaos a manes de milicianos palestinos.
 
Una fonte militar israelina confirmó qu'hubo un enfrentamientu na frontera cola Faza de Gaza, pero la vocería refugó facer comentarios, ufrir detalles o dicir si se produxeron víctimes.
  
Dende la selmana pasada aumentó la tensión a lo llargo de la frontera con Israel de la Faza de Gaza y l'Exércitu israelín efectuó dellos ataques aéreos contra oxetivos militares en respuesta al surdimientu que se produxo esti mes de los llanzamientos de cohetes dende'l territoriu costeru.
  
A los infiltraos garráronlos cerca del pasu de Kissufim y diben desarmaos, según informó'l Canal 10. Nengún grupu milicianu palestín fixo comentariu algún sobre esta información.
  
Una fonte de seguridá de Gaza confirmó que se produxeron tiros na zona y que, depués, un helicópteru israelín los sobrevoló.