UNA va pidir en Venecia l'ingresu na Alianza Llibre Europea

UNA va pidir esti vienres en Venecia l’ingresu n’ALE. Faustino Zapico afirmó que d’aceptase la so entrada “el nacionalismu asturianu taría homologáu al d’otros países europeos.

Yolanda González y Ernesto Avelino Suárez son los dos miembros d'UNA que se van desplazar a Venecia pa participar na Asamblea Xeneral añal de l'Alianza Llibre Europea (ALE). Nesti congresu van tar presentes los dos representantes d'UNA y van participar con drechu a votu más de 30 partíos políticos, qu’aldericarán sobre l'inxertamientu de la organización asturiana.
 
Según Yolanda González, componente de la Xunta Executiva de la organización nacionalista, "UNA lleva más d'un añu en contactu cola ALE y cumple los requisitos pa ser miembru d'esti partíu européu, polo que va unos meses presentare la so candidatura a la que n'avientu dio un informe positivu la Executiva de l'ALE, que ye'l que presenta agora la nuestra candidatura en Venecia pa la so aprobación na Asamblea Xeneral".
 
Los componentes de l'ALE ingresen nun primer momentu como miembros observadores, condición de la que va cuntar UNA si l'Asamblea Xeneral da'l so preste, pa inxerise darréu como miembros de plenu drechu.
 
Faustino Zapico, voceru d'UNA señaló que la incorporación d'una organización asturiana a l'ALE diba suponer un fuerte sofitu al nacionalismu asturianu, que s'homologaría asina per primer vegada na so historia col d'otros países d'Europa y abre la posibilidá de qu'Asturies cuente con una voz propia y directa nel Parllamentu Européu, “nel que se deciden yá gran parte de los asuntos qu'afeuten a Asturies”.
 
Nesti momentu los siete eurodiputaos de l'ALE formen un grupu conxuntu na eurocámara con Los Verdes, nel grupu parllamentariu Greens-EFA que tien 55 eurodiputaos y que na so condición d'ún de los principales grupos parllamentarios europeos (el cuartu en númberu de representantes depués del Popular, el Socialdemócrata y el Lliberal), condicionen les principales polítiques de la Unión.
 
Esti partíu políticu européu cuenta con siete eurodiputaos y axunta a fuerces nacionalistes d'esquierdes y progresistes. La delegación d’UNA cuenta dir actualizando nel so Twitter la sesión de l’ALE.