La incineradora más cerca

Coxersa va treslladar esti viernes la so propuesta sobre la incineradora. Mientres, el presidente de la UCD diz que PP y PSOE ganaran la batalla, "pero nun convencen".

La comisión delegada del Coxersa va axuntase esti vienres y va treslladar la propuesta pa la construcción d'una planta incineradora n'Asturies a la Xunta de Gobiernu del Consorciu, que va decidir na primer quincena d'abril.

Esos son los plazos que remanen los dirixentes de Coxersa y que güei los sos máximos dirixentes punxeron en conocencia de los representantes de los distintos grupos parllamentarios de la Xunta Xeneral del Principáu (PSOE, PP ya IU-BA-Verdes). Ye'l segundu conceyu ente Coxersa y los grupos sobre esti asuntu.

Según señaló'l voceru parlamentariu del PSOE, Fernando Lastra, dende Coxersa treslladóse la idea de realizar pruebes de quema de llodos en cementeres y centrales térmiques que van permitir afinar la propuesta inicial, anque la planta moveríase ente 420.000 y 450.000 tonelaes. La opinión del PSOE ye favorable a la construcción de la planta.
  
Preguntáu sobre si nun sería más conveniente qu'esti asuntu se tratare nun Plenu de la Xunta Xeneral del Principáu, Lastra dixo que non, porque se trata d'una decisión estratéxica del Consorciu. Recordó qu'en Coxersa tán representaos los distintos conceyos y el Principáu. Amás recordó que too forma parte del Plan de Futuru ellaboráu nel 2003. Lo que sí se da yá por acabaos son los contactos de Coxersa colos grupos parlamentarios asturianos.
 
Pela so parte, la diputada d'IU-BA-Verdes, Emilia Vázquez, comentó que'l presidente de Coxersa, Francisco González Buendía, treslladára-yos la idea de convocar a los órganos de Gobiernu pa decidir la construcción de la planta. Pero pa IU-BA-Verdes resulta "innecesario" executar la construcción d'esa incineradora con tanta priesa, sin agotar los planes qu'esisten na comunidá autónoma en materia de xestión de residuos.
 
"Ye necesario gastar toles posibilidaes medioambientalmente más sostenibles antes de dar lluz verde a una macroincineradora", insistió. Emilia Vázquez tamién ve necesaria la puesta en marcha d'una Llei de Residuos n'Asturies. Recordó que l'alcuerdu de Gobiernu ente PSOE y IU-BA-Verdes nun contempla esti asuntu.
 
"Ganaran la batalla, pero nun convencen"
 
El presidente de la Unión de Consumidores d'Asturies, Dacio Alonso, aseguró que PP y PSOE "van poder ganar la batalla sobre la incineradora, pero nun van convencer a naide". Nestos términos refirióse Alonso al alcuerdu al qu'ambos partíos políticos llegaron sobre la construcción d'una planta incineradora en Serín, instalación qu'aprobará la comisión delegada de Coxersa'l próximu vienres. "Produzmos tristura ver que los dos partíos dan un pasu asina y opten pol peor sistema posible", esplicó'l presidente del consorciu cívicu, qu'apuntó que la planta incurre nuna "manifiesta illegalidá".
  
Según dixo, la llei establez que sólo pue contemplase la opción de la incineración de residuos cuando'l restu de les víes -reducción, reutilización y reciclaxe- tean agotaes y, p'Alonso, nun ye ésta la situación actual. Amás, el presidente d'UCE adelantó que'l consorciu va publicar un estudiu que demuestre que la incineración "nun yá ye la meyor opción, y que ye una opción que nun va acabar col vertederu".
  
Nesti sen, apuntó que les povises tóxiques que va xenerar la planta de Serín van llegar a 130.000 tonelaes añales, y que van tener que ser trataes nel vertederu, polo que nun va acabar col problema. "Dende UCE vamos siguir combatiendo y informando", acabó Dacio Alonso.