Software llibre tamién en valencianu

Softcatalà y el coleutivu Escola Valenciana acaben de presentar Softvalencià, una iniciativa que quier potenciar el software na variedá del catalán propia de la Comunidá Valenciana.

Asina quieren ufiertar nesta variante ferramientes y manuales necesarios pa tener un sistema dafechu en catalán, impulsar ferramientes de traducción y correición, y tamién promover la navegación en catalán.
 
La finalidá ye poder disponer de software na variante valenciana ensin tener que doblar esfuercios. Como espliquen los impulsores, la localización en distintes variantes d'una mesma llingua ye habitual nel ámbitu informáticu: ye posible atopar software nes variantes d'inglés americanu o británicu, o d'español d'España o d'Arxentina .
 
Softvalencià nun ye una entidá nueva de traducción de software llibre, sinón que ñaz al traviés y dientro de Softcatalà, cuando en 2005 los miembros valencianos entamaron a facer usu de la so variante faciendo una guía d’estilu dende’l catalán estándar.
 
Softvalencià recibió'l sofitu de los servicios llingüísticos de les universidaes públiques valencianes y de l’Academia Valenciana de la Llingua, faciedo usu de les sos normes ortográfiques.