Alcuerden reducir les captures de bocarte a 100 quilos por tripulante

Les cofradías de pescadores vasques y cántabres alcordaron en Santander reducir a 100 quilogramos por tripulante embarcáu y día'l máximu de captures de bocarte.

Esta midida, que ye de valir siempre y cuando se pesque un mínimu de 50 pexes por quilu y con un marxe de tolerancia del 10%, foi algamada tres más de dos hores de xunta, tamién establez que la venta del bocarte esta selmana va facese namás el martes 23 y el miércoles 24. El restu de los díes va decidise en función de los precios.
  
Estes son les principales midíes que van adoptar los pescadores en comprobando los reducíos tamaños del bocarte del Cantábricu que s'atoparon na mar al adelantar la so salida pol zarru antemanáu de la costera de la xarda, motiváu pol escosamientu del cupió.
  
Cada puertu va designar a una persona de contactu p'analizar el desarrollu de la costera, y la situación volverá tratase'l próximu llunes, día 29, a les 9.30 hores, nun conceyu na sede de la Federación vizcaína, en Bilbao.
  
L'acuerdu algamáronlu los representantes de les Federaciones de Cofradíes de Pescadores de Cantabria, Manuel Vinatea; Vizcaya, Iñaki Zabaleta; y Guipuzcúa, Eugenio Eldualle. Al conceyu en Santander nun asistieron, sicasí, los representantes de Galicia y Asturies, al atopase nun alcuentru de la Federación Nacional.
  
Pese a esta ausencia, a vascos y cántabros estrañaría-yos muncho que nun se sumaren a esti acuerdu. "Si nun asumen l'acuerdu, van tener qu'asumilu como seya", señaló'l presidente de les Cofradíes de Cantabria, Manuel Vinatea.