Yá somos más de 200

Dende qu’abrió’l pasáu vienres pela tarde, Ximiélga.me nun paró de medrar; 201 ye anguaño (15.15 hores) el númberu total d’usuarios. Asturies.com tamién tien el so propiu perfil.

Xente de toa Asturies, tamién dende Ponferrada, La Coruña o mesmamente México, tán na rede social. Pel momentu poques muyeres, namás un par ente los más de cien homes que yá formen parte de Ximiélga.me.
 
La primer rede social n'asturianu ufre al usuariu una serie de servicios mui asemeyaos a los incluyíos en redes como Facebook o Twitter, como'l 'microblogging', la creación d'álbumes de fotos, la xestión d'enllaces, la integración de conteníos multimedia de sitios como Youtube, Dailymotion, Jamendo o Viemo, o el reductor asturianu de señes URL Acurti.es... La rede asturiana ta pensada pa funcionar en too momento como 'amestador' d'usuarios de eses otres redes.
 
Pa ello, Ximiélga.me integra les sos funciones mui fácilmente con Twitter o Identi.ca, y los conteníos de la rede asturiana se pueden espublizar automáticamente n'otres como Facebook, MySpace o en sitios de noticies como Esbilla o Chuza!, ente otros. Esti aspeutu, el de la integración y interconexón con otres redes, sedrá una de les estayes nes que Ximiélga.me pondrá l'acentu nel so desarrollu futuru.
 
El sitiu, que naciera como una alternativa n'asturianu a les grandes redes sociales, preséntase finalmente col envís de ser un puntu d'alcuentru n'internet pa tolos asturianos, d'Asturies y de tol mundu, y por ello yá ta disponible tamién en castellanu y n'inglés.
 
Entidaes como’l Conseyu de la Mocedá de Llaviana, medios de comunicación como Fnast.net o políticos como Xuan Xosé Sánchez Vicente tamién tienen el so propiu perfil na primer rede social asturiana y n’asturianu. Asturies.com ye un de los diarios dixitales que yá abrió la so propia cuenta, onde tolos díes dirá esbillando les principales noticies de la xornada qu’afeuten al mundu asturianista.
 
Na rede social yá esisten grupos al estilu de Facebook. Asina, podemos ver xente que nagua pola xuntanza del asturianismu, que piden un remocique d’esbilla.net, que s’entruguen ónde ta la Pita de la Xunta o grupos más humorísticos, asemeyaos a los grupos de “señoras que…” del Facebook, nesti casu “paisanes que…”.
 
Ximiélga.me foi desendolcáu por Altuxa.com, alcuñu col qu'el corverán Mikel González empobinare dende l'añu 2000 dellos proyeutos n'internet, na so mayoría relacionaos cola creación de ferramientes web n'asturianu. N'esti casu, Altuxa.com contó col sofitu del colectivu pa la traducción y promoción del software llibre, Softastur, y de la trentena de blogueros que dende xineru vienen testiando la rede enantes de la so apertura definitiva. Ximiélga.me ta basao na plataforma llibre Elgg.