De sumar 30.000 nueches de condena a sumar la memoria

Ángeles González Sinde y Vicente Álvarez Areces, inauguraron güei l'Archivu Históricu Provincial Rexonal d'Asturies asitiáu nel remodeláu edificiu de l'antigua Prisión Provincial, n'Uviéu.

"Nel pasáu esti edificiu sumó más de 30.000 nueches de condena y d'equí p'arriba va sumar tola memoria asturiana", dixo la ministra de Cultura, qu'indicó qu'igual que la memoria y les persones, "esta tamién hai que cuidala y tratala bien".
  
Mientres les intervenciones tanto la ministra como'l presidente destacaron l'esfuerzu pa facer de l'antigua cárcel "el llar de la memoria asturiana", esfuerzu que tamién foi económicu, dao que la obra supunxo una inversión de más de 18 millones d'euros.
  
"L'abertura d'un archivu siempre ye bono y trai un exerciciu de democracia y tresparencia porque va dexar a munchos investigadores aportar a importantes documentos", dixo la titular de Cultura, qu'indicó que nesti casu ye "especialmente importante porque se recupera pa Uviéu un edificiu onde miles de persones perdieron la so llibertá".
  
Destacó amás la "fuerte apuesta d'Asturies" pola cultura, refiriéndose a otros proyectos "d'envergadura internacional" como'l Muséu Arqueolóxicu, el Centru Niemeyer o la Universidá Llaboral, que faen qu'Asturies s'asitie nel panorama mundial con fuerza.
  
Álvarez Areces manifestó que "les palabres sobren" pa entender el significáu del edificiu recién remodeláu, polo qu'estimó l'esfuerzu del Gobiernu de Zapateru pa dotar a Asturies d'un centru cultural de tal calibre nun llugar nel que "munches persones perdieron la vida o bona parte de los sos años por lluches pola tan ansiada llibertá y la democracia".
  
"En memoria de toos ellos dexamos equí una güelga", dixo Areces, qu'añadió qu'agora Asturies mira al futuru con ambición. Nesti sen indicó qu'en collaboración col Gobiernu d'España y de manera particular col Executivu d'Areces, produxéronse les "mayores inversiones que tuvieren llugar n'Asturies en tola so historia".
 
D'esta manera refirióse al Muséu Arqueolóxicu, el Plan de Prerrománicu, el plan de la catedral, el Muséu de Belles Artes  y el puxu d'elementos claves de la cultura. "La capital d'Asturies recibió unes inversiones estraordinaries que se notaron en too", dixo Álvarez Areces, que cifró en "unos 891 millones d'euros la inversión desarrollada n'Uviéu dende 1999", en distintos proyectos -non yá culturales- que se fueron desarrollando.
  
El nuevu proyeutu de l'antigua cárcel, realizáu pola arquiteuta Remedio Fernández Carrión, consistió en recuperar la estructura orixinal del edificiu de más d'once mil metros cuadraos de superficie, caltener la so gran cúpula central y nuna remodelación total del interior, onde s'instaló un centru cultural con una sala d'investigadores, otra d'esposiciones, llaboratorios de digitalización y talleres de restauración.
  
L'área del Archivu Históricu Provincial y Rexonal d'Asturies va tener capacidá p'acoyer hasta 65 quilómetros de documentación, más del doble de lo que  permitía la sede anterior del Archivu Provincial. Ambes instituciones van compartir instalaciones col fin d'optimizar la inversión y evitar la duplicidad de servicios.
  
L'Arquivu Históricu Provincial, creáu en 1956, cuenta colos protocolos notariales de más de cien años d'antigüedá de la provincia, los llibros de Contaduríes d'Hipoteques, la documentación de los servicios provinciales y de l'alministración central y numberosos fondos privaos mercaos pol Estáu y la Comunidá Autónoma. A esta documentación va sumáse-y la del fondu históricu del Archivu Rexonal d'Asturies.
  
Nel actu d'inauguración tamién tuvieron presentes, amás de los representantes de les empreses encargaes de desarrollar los trabayos, l'alcalde d'Uviéu, Gabino de Lorenzo; la conseyera de Cultura y Turismu, Mercedes Álvarez; l'alcaldesa de Xixón, Paz Fernández Felgueroso; el delegáu del Gobiernu, Antonio Trevín; el Fiscal Superior, Gerardo Herrero o'l presidente del Tribunal Superior de Xusticia d'Asturies, Ignacio Vidau.