La esquierda confirma la so victoria nes rexonales franceses

|

Los sondeos confirmaron los pronósticos qu'auguriaben una clara victoria del socialismu francés, que llograría’l 49% de los votos. En Córcega’l nacionalismu sumó’l 36% de votos.

L'ultraderechista Frente Nacional (FN) confirmó tamién el so ascensu, col 17,5% de los votos, nunos comicios marcaos nuevamente pola fuerte astención. La participación superó'l 49%, según les encuestes a cuerpu d'urna, lo que supón una subida de diez puntos sobre la votación de la primer vuelta celebraos el pasáu domingu, cuando la participación cifróse nel 39,29%.

La primer en comparecer esti domingu, poco depués de les 20.00, hora del zarru de les urnes, foi Ségolène Royal, ex candidata presidencial y candidata a la reelección en Poitou-Charentes. Royal afirmó que se trata d'un "votu de castigu" que "pon a la drecha a un pasu de la derrota". "El presidente de la República, el Gobiernu y la so mayoría tienen de tomar concencia d'esta derrota y reconocer el so fracasu", añadió.

El primer Ministru, François Fillon dixo reconocer "l'ésitu de les llistes d'esquierda a les eleiciones rexonales y asumir el so parte de responsabilidá". Va ser recibíu'l llunes pela mañana por Nicolas Sarkozy, "para facer balance del mensaxe de los franceses", anunció l'Elíseo.
  
"Ye necesario volver otra vuelta a los nuesos raigaños, esto ye, a lo que dexó la elección de Nicolas Sarkozy como presidente de la República y la mayoría del 2007", afirmó'l voceru del grupu de la UMP na Asamblea Nacional, Jean-François Acopé, que reconoció una "verdadera derrota".
  
Polo xeneral, les victories del PS fueron clares. En Poitou-Charentes, la presidenta saliente y ex candidata presidencial Ségolène Royal recibió l'apoyu d'entre'l 60 y el 61%, superando claramente a la ministra de Tresportes, Dominique Bussereau.
  
N'Île-de-France, el socialista Jean-Paul Huchon tamién llogró la victoria sobre la so rival conservadora, Valérie Pécresse. El presidente rexonal saliente llograría un 55,3% de los votos, según resultaos parciales publicaos pol Ministeriu d'Interior.
  
Los socialistes Jean-Jack Queyranne (51%) en Ródano-Alpes y Daniel Percherón (51,8%) en Nord-Pas de Calais, según Georges Frêche en Languedoc-Rosellón (54%), caltienen ensin problemes el so cargu.
  
En Provenza-Alpes-Mariña Azul, el presidente saliente, Michel Vauzelle (PS), impónse con un 43% frente a Thierry Mariani (33%), de la UMP. La tercer opción ye'l cabezaleru del FN, Jean-Marie Le Pen (24%), colo qu'algama remontar en cuatro puntos el so apoyu con sobre la primer vuelta.
  
Jean-Yves Le Drian (PS) caltién (49,9%) la Bretaña imponiéndose a la UMP (32%) y a Europa Ecoloxía (17,9%). En Pais del Loira, Jacques Auxiette (PS) axuntó un 57,2% ante'l candidatu de la UMP, Christophe Béchu (42,8%).
 
36% d’apoyu nacionalista en Córcega
  
En Córcega, única rexón metropolitana, con Alsacia, que permaneciere en manes de la UMP na victoria socialista del 2004, el PS algamaría la victoria. Los socialistes llograríen el 36,7% de los votos, per delantre del UMP (27,5%) y de les dos llistes nacionalistes (25,9% y 9,9%), según una estimación publicada por France Bleu Frequenza Mora, France 3 Corse y l'institutu MediaTerra.
  
N'Alsacia la UMP caltién el gobiernu pese a que los últimos sondeos de campaña auguriaben un empate técnicu col PS. Los conservadores llograríen ente'l 46 y el 47% de los sufraxos, según los sondeos a cuerpu d'urna, bien per delantre del PS (39%) y el Frente nacional (14% al 15%).
  
Otru motivu de satisfaición pal UMP ye la victoria en Reunion (ultramar), onde Didier Robert impúnxose (45,46%) sobre'l presidente rexonal, Paul Vergès, y el candidatu socialista.

Contador Estadistiques