UNA recuerda la mala calidá del aire nel centru d’Asturies

Unidá Nacionalista Asturiana considera pergrave qu'Asturies quiera construyir una incineradora magar l'alvertencia de la Unión Europea sobre la contaminación del aire.

Según UNA, de los contaminantes que se miden nel informe de calidá del aire, Asturies presenta defeutos en toos ellos, por tar cercanos a la llende máxima dada. “Ye sobre manera negativa la situación de la zona central, onde se perpasen toles llendes. Estos datos tienen l'agravante de correspondese col primer añu de la crisis económica, cola baxada de producción”, afirmen.
 
Los nacionalistes afirmen qu’habría que buscar soluciones p'amenorgar estos contaminantes. Pa la organización, les propuestes del Gobiernu asturianu pasen por construyir térmiques de gas na zona central, “como la de Corvera, nel que'l so principal vertíu va ser NO2, ún de los contaminantes nos qu'esta zona yá supera les llendes máximes, amás d'esto una macroincineradora que va vertir, ente otros contaminantes, abondoses partícules en suspensión”, apunten.
 
Tino Fernández, voceru de medioambiente de la federación nacionalista declaraba “tenemos de ser conscientes de qu'estos niveles de contaminación, amás de ser un llastre pa la salú pública, van selo tamién n'aspeutos económicos, non yá poles sanciones que vamos tener que pagar, sinón porque va ser cada vegada más difícil qu'otres industries que xeneren valor amestáu vengan a Asturies. Nun tenemos de cayer nel discursu de desarrollismu ensin desenvolvimientu de PSOE-IU”.
 
“¿Cuántos muertos va tener que poner Asturies pa que zones más riques del estáu sigan viviendo de la lletricidá que producimos equí?”, entrugóse Fernández, qu’aseguraba tamién que “acordies col mesmu informe de la Unión Europea, el 83% de los asturianos vivimos sometíos a niveles de contaminación perriba de los valores llende y sicasí'l Gobiernu paez nun ver nenguna rellación cola alta tasa de problemes respiratorios de los que se carecen na zona central d'Asturies. Cuido que los ciudadanos ameriten dalguna esplicación”.