El Parllamentu condena les llendes de llibertaes polítiques en Cuba

La Xunta Xeneral aprobó ayeri una proposición non de llei que condena la llende de llibertaes polítiques en Cuba y que muestra la condolencia a la familia y amigos d'Orlando Zapata.

La midida foi aprobada colos votos de PP y PSOE, mientres qu'IU-BA-Verdes decidió astenese, depués de que'l PP nun aceptara les seis enmiendes que presentó. Lo cierto ye que'l testu de la iniciativa ta redactáu nos mesmos términos que la declaración institucional, acabante d'aprobase nel Congresu de los Diputaos.
  
El diputáu del PP, Joaquín Aréstegui, defendió la iniciativa y na so intervención dixo que Cuba sufre una "llarga enfermedá" qu'alministra una "xerontocracia familiar" y que padecen los cubanos. Según Aréstegui, nesti asuntu nun caben "medies tintes" y la condena ha ser "contundente".
  
Pela so parte, el diputáu socialista, Benjamín Gutiérrez, señaló que-y causó cierta sorpresa la iniciativa, puesto que'l Congresu de los Diputaos yá ficiere una declaración nel mesmu sen. Asina, y "por coherencia" dixo que'l so grupu políticu diba aprobar el testu presentáu, que ye lo mesmo que fixo nel Congresu de los Diputaos.
  
El voceru d'IU-BA-Verdes, Jesús Iglesias, condenó na so intervención l'incumplimientu de los drechos humanos. Pero, de siguío, señaló que nun ye'l país nel qu'eso pasa más. Lo que pasa, según Iglesias, ye que Cuba ta costantemente "baxo la lente" pol so modelu económicu y social que se cuestiona. "Por eso ye especialmente rigorosu nel exame de los derechos humanos", comentó Iglesias.
  
Recordó que n'otres ocasiones la Xunta Xeneral nun se pronunció sobro la vulneración de derechos humanos en territorios como Gaza o Marruecos.