Marruecos descarta definitivamente un referendu sobre'l Saḥara

El rei de Marruecos, Mohamed VI, tresmitió-y al secretariu xeneral de la ONU qu'un referendu sobre la independencia del Saḥara ya dago "definitivamente refugáu".

El monarca aconceyó esti xueves nel Palaciu Real de Tetúan con Christopher Ross, l'unviáu especial del secretariu xeneral de la ONU, Ban Ki Moon, pal Saḥara Occidental, y tresmitió-y que pa Rabat la celebración d'un referendu sobre la independencia d'esti territoriu "con opciones múltiples" y "minoritariu nes práctiques de Naciones Uníes" ta "definitivamente refugáu".
  
Coles mesmes, Mohamen VI esplicó a Ross, según informa l'axencia de noticies oficial marroquina, MAP, que la iniciativa de Rabat pa l'autonomía del Saḥara Occidental nel marcu de la integridá territorial y la unidá nacional de Marruecos "respuende perfectamente a los parámetros y directives de les resoluciones del Conseyu de Seguridá de la ONU".
 
El monarca espresó, según MAP, la "plena disposición del Reinu a negociar y a algamar una verdadera solución política definitiva a esta discrepancia rexonal sobre la base de la Resolución 1871 del Conseyu de Seguridá, d'abril del 2009, que convida a les partes a demostrar realismu y un espíritu de compromisu nunes negociaciones intenses y sustancioses".