Xune Elipe presenta'l so llibru 'Rockmería'

El cantante Xune Elipe, conocíu por ser el vocalista del grupu Dixebra y el director de la discográfica L'Aguañaz, presenta'l so llibru Rockmería na Casa Posafuelles, el chigre de la Xunta pola Defensa de la Llingua Asturiana, asitiáu n'Uviéu. El volume repasa los soníos más comprometíos del sieglu XX y presenta, "d'una manera asequible pa tolos públicos", estilos como'l folk-rock inglés, el ska xamaicanu, el raï o'l Rock Radikal Vascu, según esplica'l sellu nuna nota prensa.
  
L'actu será a les 23.00 hores nel llocal, asitiáu na Cuesta La Vega, 10, y nél va poder sentise una esbilla fecha pol autor de Rockmería cola música de la que fala nel llibru.
  
La intención d'Elipe con esta publicación ye "resumir los soníos más combativos y comprometíos que se ficieron a lo llargo del sieglu pasáu". Asina, al traviés de les sos páxines, descúbrense estilos como'l folk-rock inglés, el ska xamaicanu, el raï de la Kabilia, el zydeco de Luisiana, el rock del este d'Europa, el Rock Bravú de Galicia, el Rock Radikal Vascu, ente otres llinies musicales.
  
Nél, según indica la nota, "nun se van alcontrar productos comerciales prefabricaos, nin grandes éxitos: namás música sincera y auténtica fecha con actitú y rebeldía, soníos, estilos y propuestes que, dende un ámbitu llocal y ensin escaecer los sos raigaños (musicales o llingüísticos), supieron trescender más allá hasta convertise n'universales".
  
Según Ámbitu, 'Rockmería' "tien un carácter divulgativu, asequible pa toes aquelles persones que quieran adientrase per delles de les músiques populares más prestoses del sieglu xx".
  
El propiu Elipe esplica cuál foi l'orixe del llibru, que nació cuando echó una güeyada p'atrás y vio que "tenía un montón d'escritos espardíos per delles publicaciones colos que, cuasi ensin dame cuenta, fixera una especie d'análisis de les rellaciones ente música y compromisu". Asina, dedicó un tiempu a poner orde en tou esi material pa configurar un volume qu'entama nel añu 1914, con Joe Hill como figura característica de los empiezos del movimientu obreru nos Estaos Uníos y encarnación por escelencia d'esi 'working class hero' al que-y cantaba Dylan, y acaba a les puertes de la centuria nueva, coles orquestes multiétniques que surdieron n'Italia nel añu 2000 como respuesta al xiru xenófobu que taben garrando les polítiques de Silvio Berlusconi. Ente ún y otres, van apaeciendo estilos como'l ska -que Xune Elipe define como "la banda sonora de la independencia de Xamaica"-, el punk -"una de les mayores revoluciones musicales qu'hubo n'occidente"-, el rock irlandés -"que punxeron en pie un grupu de músicos que se comprometieron muncho cola realidá política y social del sitiu onde vivíen"- o los primeros pasos del rock and roll, qu'Elipe esplica como'l "revulsivu a les polítiques de segregación racial de los Estaos Uníos". "El rock", añade, "foi la primer música mestiza; hasta esi momentu los blancos diben per un llau y los negros per otru, pero col rock toos empezaron a sentir lo mesmo".
  
El llibru inclúi una segunda parte que, col títulu 'Asturies', ocúpase de dellos asuntos rellacionaos cola música asturiana d'estos últimos trenta años. Según les sos palabres, mentes estilos como'l folk tienen muncha bibliografía, el rock asturianu sigue tando prácticamente desnudu de referencies, y Elipe piensa que "yera necesario falar de personaxes como Berto Turulla, al que yá nun conoz muncha xente mozo, o la manera na foi surdiendo'l rock n'asturianu o lo que foi y significó lo que se conoz como Nuevu Canciu Astur. La mirada a la propia tierra yera, d'esta manera, una forma de completar l'análisis global de la música interpretada como espresión d'una conciencia colectiva, que ye, a fin de cuentes, de lo que se fala nos testos de 'Rockmería'.