El Congresu da lluz verde a la nueva Llei Audiovisual

|

El Congresu aprobó güei la Llei Xeneral de la Comunicación Audiovisual ratificando toles enmiendes introducíes nel so día nel Senáu, nun siendo algún cambiu de carácter técnicu.

El testu uníase agora al Boletín Oficial del Estáu (BOE) pa la so publicación y entrada en vixencia al mes siguiente. El proyeutu de llei pasó esta mañana'l so últimu trámite parlamentariu nel Congresu, onde s'aprobaron les enmiendes del Senáu fundamentalmente colos votos del PSOE, CiU y CC, partíos que dieron sustentu al proyeutu de llei dende l'entamu de la tramitación. Mientres, el PP y ERC-IU-ICV pronunciáronse en contra na mayoría de les votaciones. Pela so parte, el PNV, que varió'l so votu en función de cada enmienda, mostróse bien crítico con esta reforma a lo llargo del too'l procesu.
  
La llei, que ye una demanda del propiu sector y de les asociaciones de consumidores dende va años, vien apoyar unes 'regles del xuegu' sobre conteníos y funcionamientu empresarial qu'en dellos casos les televisiones yá cumplíen na práutica, pero qu'hasta agora nun taben recoyíes nuna llei xeneral, sinón n'ensame de normes parciales y códigos de autorregulación, y crea un órganu supervisor, el Conseyu Estatal de Medios Audiovisuales (CEMA).
 
Ente les principales novedaes figura un tiempu máximu de publicidá, que va ser de 20 minutos por hora ente anuncios convencionales (12 minutos), autopromoción (cinco minutos) y telepromoción (tres minutos). Esti puntu modificóse respecto al testu inicial del Gobiernu, que contemplaba la posibilidá d'emitir un total de 29 minutos de mensaxes publicitarios.
  
Otru de los temes que queden regulaos con esta llei ye la proteición a los menores. Asina, la norma establez que los conteníos que puedan ser "perxudiciales pal desarrollu físicu, mental o moral de los menores solo van poder emitise ente les 22 y les 6 hores, teniendo de dir siempre precedíos por un avisu acústicu y visual" y tamién esclúi d'esti horariu ciertos anuncios publicitarios, como'l de delles bebíes alcohóliques.  
  
Coles mesmes, mientres el so pasu pol Senáu incluyóse una protección adicional, puesto que s'acordó que les televisiones utilicen una codificación dixital especial nes sos emisiones que dexe a los padres exercer un control sobre lo que ven los sos fíos pela televisión.  
  
Per otru llau, la llei establez unes 'regles de xuegu' pal sector audiovisual que pretende dar seguridá xurídica a les empreses pa poder actuar. Nesti sen, la llei establez un réxime de concesión, arrendamientu, cesión, anovación o estinción de les llicencies audiovisuales, y recuéyese como un drechu de los operadores llanzar canales de pagu, llendándolo a un 50% de les canales concedíes a cada llecencia.
 
El voceru del PP, Miguel Ángel Cortés, criticó la creación del "innecesariu" Conseyu Estatal de Medios Audiovisuales (CEMA) porque va poder pesllar un mediu de comunicación. Cortés dixo que la puesta en marcha d'esti conseyu va implicar un gastu "non pequeñu" del dineru públicu y va ser l'organismu públicu númberu 260 qu'esiste n'España. El voceru 'popular' aseveró qu'esta llei ye una "auténtica amenaza pa la llibertá d'espresión y comunicación". Amás, Cortés llamentó que se perdiera "la oportunidá de crear una llei que creara un marcu xurídicu consensuáu pal sector" y denunció que'l Gobiernu nun fixo "el más mínimu intentu d'aproximamientu" al PP pa llegar a acuerdos.
  
Dende'l PNV, Pedro Azpiazu denunció que se fixo una llei "en beneficiu de delles empreses bien concretes" y non de los ciudadanos y añadió que la urxencia na tramitación de la norma paecía impuesta por unos plazos acordaos con UTECA".
 
En la mesma llinia, el voceru d'ERC, Joan Ridao, criticó "el procedimientu" que siguió l'Executivu nel diseñu del panorama audiovisual y acusó al Gobiernu de caltener una actitú "servil hacia'l sector priváu audiovisual". A xuiciu de Llamazares (IU), esta norma ye la "Llei Berlusconi, la llei de la mayoría privada de capital italianu, la llei de la privatización del sector audiovisual".
  
Otra manera, pal representante socialista, Óscar López, l'aprobación de güei ye "l'acabación d'una reforma audiovisual bien importante pal nuesu país, qu'ufierta seguridá xurídica al sector, refuerza'l pluralismu y da garantíes a los ciudadanos". El voceru socialista manifestó que la reforma llega tres un "ampliu alderique", cuenta con "l'alcuerdu del sector audiovisual" y implanta un nuevu modelu de televisión pública "qu'acaba cola deuda y la manipulación que caracterizó la etapa del PP nel gobiernu".
 

Contador Estadistiques