El Centru d’Arte de Tito Bustillo tará fináu esti branu

La Conseyera de Cultura, Mercedes Álvarez, anunció güei que les obres del Centru d’Arte Rupestre de Tito Bustillo van finar el próximu branu, “presumiblemente ente xunetu y agostu”.

La Conseyera, que visitó les obres acompañada pol Alcalde de Ribesella, Ramón Canal, la Direutora de la Oficina de Planificación y Xestión del Patrimoniu Cultural, Eva Sánchez, y por téunicos de la Conseyería, aseguró que yá resolvieron los problemes iniciales qu'enzancaron la execución de la cimentación y estructura previstes. Les obres del edificiu, cofinanciaes pol Ministeriu de Fomentu y el Gobiernu d'Asturies, entamaron n'agostu de 2008.
 
El Centru va allugase nun edificiu concebíu como una caxa acristalada asitiada nes proximidaes de la entrada de la cueva, va disponer d'unos 5.000 metros cuadraos de superficie y va cuntar con tres plantes nes que se va distribuir el programa d'usos previstu pal Centru, que va cuntar con espacios espositivos y d'atención al públicu.
 
La cueva de Tito Bustillo atópase ente los conxuntos rupestres paleolíticos más importantes de la Cornisa Cantábrica. En xunetu de 2008, el Comité Permanente de la Unesco incluyó esti xacimientu nel so escoyíu llistáu de patrimoniu mundial, al empar d'otres cuatro cueves asturianes (El Pindal, La Peña de Candamo, Llonín y La Covaciella) y nueve más de Cantabria y el País Vascu.