Suatea analiza l'usu del asturianu como llingua vehicular na enseñanza

|

La potencial utilización del asturianu como llingua vehicular na enseñanza, en cuenta de como una asignatura, será ún de los temes a tratar nes segundes Xornaes 'Llingua y Educación'.

Asina lo esplicó güei Xosé Luis Colodrón, responsable de la Secretaría de Llingua del Sindicatu y ún de los organizadores de les Xornaes, que'l sindicatu d'enseñanza Suatea va entamar mañana y pasao nel Centru Cultural El Llano de Xixón. Pa Colodrón, n'Asturies esiste personal y medios bastantes como pa dar esti usu docente a la llingua asturiana.
  
Una de les charres programaes será la de mañana, a les 16.30, a cargu d'Aitor Etxarte Berezibar, director de la Ikastola Hegoalde, de Pamplona. Colodrón esplicó que nesti centru de Navarra, "conviven l'eusquera, el castellán y l'inglés, polo qu'Etxarte va esplicar cómo conviven, la xeneral del Estáu, la minoritaria y la llingua de comunicación más internacional". "Vamos ver cómo faen esa planificación porque equí la nuesa llingua ta tratada como una estranxera, con una carga horaria ínfima, con una carga horaria pequeña, y sin una utilización vehicular", criticó. "Nun ta utilizada como una llingua de comunicación y d'instrucción, sinón sólo pa la propia llingua y pa les actividaes relacionaes cola propia llingua", añadió.
  
Entrugáu por Europa Press si ve factible que n'Asturies se llegue a usar l'asturianu como llingua vehicular na enseñanza, respondió que sí. "Ye ún de los nuestros oxetivos. Puxamos pa que l'asturianu s'emplegue como llingua vehicular. Agora mesmo tropiézase cola voluntariedá. Los padres del alumnáu tienen drechu a elixir la llingua que quieran, pero nun se promociona l'asturianu nel sen d'introducilu nel currículu". comentó.
  
Pa ello reivindicó que l'asturianu "tien que tar presente nel currículu en toles etapes y niveles". "Alministrativamente sí ye posible, porque existe material, existen competencies y existe profesoráu. Hai 180 profesores que lu dan mayoritariamente en precario, porque son interinos, pero que son personal cualificáu". Nesti sen, consideró mui importante tamién la reconocencia de la especialidá docente de llingua asturiana.
  
Dientro del programa de actividaes tamién ocupará un llugar importante'l taller Edubuntu, a cargu de l'asociación Softastur, que presentará'l nuevu sistema operativu GNU/Linus aplicáu a la enseñanza pal profesoráu de secundaria y de primara. Nes xornaes amás habrá charres esplicatives sobre los planes d'estudiu de llingua na Escuela de Maxisteriu y na Facultá de filoloxía, a cargu de los profesores Xosé Antón González Riaño y Xulio Viejo Fernández, y sobre les diferentes esperiencies docentes.
  
A lo último presentaránse los nuevos llibros y materiales tanto pa los niveles de primaria como pa los de secundaria.

Contador Estadistiques