91 palestinos y 14 soldaos israelinos firíos nos disturbios de Xerusalén

91 palestinos firíos y 60 deteníos son el resultáu de los disturbios qu'entamaron esti martes en Xerusalén. Tamién foron firíos14 policíes israelinos, ún d'ellos d'un tiru na mano.

Los incidentes produxéronse principalmente nos barrios de Wadi Al Joz y Eisawiyah, en Xerusalén Este y cercanos a la Ciudá Vieya, mientres ésta permaneció "en calma por cuenta de la fuerte presencia policial", indicó voceru de la Policía israelina Mickey Rosenfeld. Ello ye que na ciudá santa aplicáronse'l quintu día siguíu fuertes midíes de seguridá, como la llende del accesu en función de la edá.
  
Según Rosenfeld, cuatro de los axentes firíos tán hospitalizaos, ente ellos el que recibió'l tiru. La zona onde se produxo dichu incidente, nel distritu de Ras Al Amoud, en Xersusalén Este, llendóse, y la Policía ta buscando a un sospechosu.
  
En total más de 100 palestinos resultaron firíos en distintes zones árabes ocupaes de Xerusalén Este y Cisxordania, según fontes médiques. Les fuerces de seguridá israeliness impunxeron un fuerte bloquéu nes zones ocupaes de Xerusalé Este, especialmente pel entornu de la mezquita d'Al Aqsa, centru relixosu nel que tuvo acutáu l'accesu hasta a muyeres.
  
Imaxes mostraes por Al Yazira muestren a la  Policía israelina prohibiendo la cubrición periodística de los incidentes. Mentanto, decenes de ciudadanos palestinos manifestáronse na Franxa de Gaza pa mostrar la so solidaridá colos habitantes de Xerusalen.
  
Na ciudá de Huwara, al sur de Nablus, testigos citaos por Maan aseguren que les fuerces de seguridá hebrees aventaron una marcha pacífica d'estudiantes con bombes de fumo y granaes, pero nun esisten informaciones sobro firíos nesta población.
  
Un voceru del Exércitu israelín defendió l'actuación de les fuerces de seguridá asegurando que se procedió a aventar la protesta dempués de qu'un grupu d'unos 20 manifestantes llanzare piedres contra trés vehículos de civiles israelinos.
    
El brazu armáu d'Al Fatá, les Brigaes de los Mártires d'Al Aqsa, anunció esti martes que pidió a l'Autoridá Palestina que-y dexe volver a entamar la llucha armada contra Israel y que llibere a los  terroristes deteníos poles fuerces de seguridá palestines.