Repsol va invertir hasta 7,4 millones en buscar hidrocarburos na costa

Repsol tendrá qu’invertir 2,46 millones añales nos próximos tres años na busca d'hidrocarburos na mariña d'Asturies, onde topó "nicios razonables" de la esistencia de recursos.

Esti requisitu apaez recoyíu nuna orde ministerial del Ministeriu d'Industria publicada esti miércoles nel Boletín Oficial del Estáu (BOE), nel que s'establecen les condiciones y los detalles de la prollongación escepcional de los permisos d'esploración na zona mientres tres años por nicios d'hidrocarburos.

Sicasí, el departamentu dirixíu por Miguel Sebastián puntualiza que la inversión de 2,46 millones añales nun tien por qué aplicase hasta'l final del trieniu, puesto que Repsol va poder renunciar a los permisos al acabar cada exerciciu si los resultaos de los sos sondeos nun son positivos.
  
Los trabayos na zona van consistir n'actividaes del gabinete xeolóxicu y xeofísicu, en cálculos de reserves y riesgos xeolóxicos, n'estudios de viabilidá de la perforación de sondeos y na evaluación final de los prospectos que superen los controles de calidá técnica y económica fixaos.
  
La orde da forma a l'aprobación nel Conseyu de Ministros el pasáu 12 de febreru de la prórroga de busca d'hidrocarburos pa los permisos d'investigación de 'Ballena 1', 'Ballena 2', 'Ballena 4' y 'Ballena 5'. Repsol renunció al permisu 'Ballena 3' ante "la falta d'oxetivos exploratorios".