Prealcuerdu pal primer pautu pol Arte Asturianu

El Ministeriu de Cultura, la Conseyería de Cultura y Turismu del Principáu, la Ilesia y los conceyos van roblar un conveniu pa sacar alantre'l primer pautu pol Prerrománicu Asturianu.

El Gobiernu del Principáu, el Ministeriu de Cultura, l'Arzobispáu d'Uviéu y los siete conceyos asturianos que cunten con monumentos prerrománicos (Colunga, Pravia, Santu Adrianu, Les Regueres,  Ḷḷena y Villaviciosa) algamaron un compromisu previu pa sacar alantre'l conveniu de collaboración que regula les actuaciones y responsabilidaes que va asumir cada parte en rellación col caltenimientu, la restauración y la divulgación de les principales manifestaciones del Arte Asturianu.
 
Según el borrador del conveniu, l'Arzobispáu tien de comprometese a garantizar el caltenimientu, curiáu y l'atención al públicu de los distintos bienes patrimoniales prerrománicos. Mientres que los conceyos van responsabilizase de la meyora de les redolaes, garantizando la so llimpieza y seguridá. Per otru llau, el Gobiernu d'España va collaborar col Principáu d'Asturies nel desenvolvimientu de programes d'investigación, restauración y promoción del Prerrománicu, poniendo a disposición de tala finalidá los servicios técnicos propios del Institutu del Patrimoniu Cultural d'España.
 
Toes les partes comprometiéronse a estudiar el documentu, coles mires de que se pueda suscribir el conveniu lo más ceo, dando entamu con ello a una actuación integral y coordinada de toles alministraciones y de la Ilesia. Los asistentes a la xunta tamién alcordaron un primer calendariu d'actuaciones pa 2010, centraes na restauración.
 
Unes actuaciones qu’empecipiaran coles obres de meyora de la cubierta de Santuyano de los Praos, asina como la restauración integral de San Salvador de Valdediós, en dos actuaciones que van suponer una inversión conxunta de cerca de 450.000 euros. Tamién ta aprobáu yá'l proyeutu pa la restauración de San Miguel de Lliño.